აშკარად უგერგილო შედარება გამოვიდა, იმიტომ, რომ ეს დიალოგი ყველაფერს შეიძლება ჰგავდეს, მაგრამ ტანგოს ცეკვას – არა, – ამის შესახებ ოპოზიციონერმა გიგი უგულავამ „პალიტრანიუსის“ ეთერში განაცხადა.
„მე ვფიქრობ, სურვილი ჰქონდათ ხატოვანი შედარება ყოფილიყო, მაგრამ აშკარად უგერგილო შედარება გამოვიდა, იმიტომ, რომ ეს დიალოგი ყველაფერს შეიძლება ჰგავდეს, მაგრამ ტანგოს ცეკვას – არა, მათ შორის იმიტომ, რომ ჩვენ, სამწუხაროდ, ჩამოვყალიბდით ქვეყნად, სადაც ხელისუფლებასა და ოპოზიციას არ შეუძლია ნორმალური ლაპარაკი და მას აუცილებლად მედიატორი სჭირდება და ტანგოს მედიატორი არ სჭირდება მოგეხსენებათ – ფასილიტატორი შეიძლება სჭირდება მწვრთნელის სახით, მაგრამ არა მედიატორის სახით, რომელმაც დღის წესრიგი პირდაპირ განსაზღვრა. შესაბამისად, მე ვვარაუდობ, რომ იმის გამო, რომ ძალიან მაღალი ჩართულობაა, შედეგი იქით ან აქეთ ძალიან სწრაფად უნდა დაიდოს. მე ვერ ვივარაუდებ შედეგს, იმიტომ, რომ ჩვენ გვყავს აბსოლუტურად არაპროგნოზირებადი ხელისუფლება, რომელმაც სიგიჟეების კასკადი ჩაიდინა და ქვეყნისა და საკუთარი თავის მდგომარეობა თვითონვე დაიმძიმა,“- განაცხადა გიგი უგულავამ.
ცნობისთვის, მმართველი გუნდის წარმომადგენელმა, გიორგი ხელაშვილმა განაცხადა, რომ მოლაპარაკებებში შედეგის მისაღწევად საჭიროა, როგორც ხელისუფლების, ასევე ოპოზიციის კონსტრუქციულობა.
„ტანგოს ცეკვისთვის ორია საჭირო, შესაბამისად, პროგრესისთვის საჭიროა არა მარტო მთავრობის, არამედ ოპოზიციის კონსტრუქციულობა. თქვენ ნახეთ, რომ პირველივე საათებში, როგორც კი მოლაპარაკება დასრულდა, რა ხებოდა პარლამენტის გარეთ,“ – განაცხადა ხელაშვილმა.
