„ეს სასამართლო არ არის. ეს არის მონსტრების კორპორაცია, საჯიჯგნად მთლიანად ივანიშვილმა ჩაუგდო ხელში თავის ყმას მურუსიძეს“,- ამის შესახებ „ევროპული საქართველოს“ წევრმა, გიგი უგულავამ გიორგი რურუას საქმესთან დაკავშირებით საუბრისას განაცხადა.
მისი თქმით, მიღებული გადაწყვეტილება უსამართლო და დაუსაბუთებელია.
„ეს განაჩენი, რომელიც დღეს ჩვენ ჭილობში გამოხვეული მოსამართლისგან მოვისმინეთ, 18 ნოემბერსვე იყო ცხადი, როცა გიორგი რურუა დააკავეს. ეს სასამართლო არ არის. ეს არის მონსტრების კორპორაცია, საჯიჯგნად მთლიანად ივანიშვილმა ჩაუგდო ხელში თავის ყმას მურუსიძეს. აბსოლუტურად უსამართლო, დაუსაბუთებელი გადაწყვეტილებაა. მერე ნუ გვიკვირს რატომ არის ასეთი ტოტალური უნდობლობა გამოძიების მიმართ. სანამ ეს “ჩმორების” კორპორაცია იქნება, ადამიანი ამ ქვეყანაში სამართალს ვერ იპოვის“,- განაცხადა გიგი უგულავამ.
ცნობისთვის, „მთავარი არხის“ ერთ-ერთ მეწილეს გიორგი რურუას 4 წლით პატიმრობა შეეფარდა.
შეგახსენებთ, რომ გიორგი რურუა 2019 წლის 18 ნოემბერს დააკავეს. მას გამოძიება სსკ-ის 236-ე მუხლის მესამე და მეოთხე ნაწილებით გათვალისწინებულ დანაშაულს ედავება, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
