ევროსაბჭოს მინისტრთა კომიტეტი ვანო მერაბიშვილის საქმეზე განცხადებას ავრცელებს. კომიტეტი საქართველოს ხელისუფლებას მოუწოდებს, წარმოადგინოს ანგარიში შს ყოფილი მინისტრის ციხიდან გაყვანის ეპიზოდზე.
შეგახსენებთ, რომ აღნიშნულ ეპიზოდზე სტრასბურგის სასამართლომ ვანო მერაბიშვილის სასარგებლო გადაწყვეტილება გამოიტანა და საქართველოს ხელისუფლებას საქმის დროული და ეფექტური გამოძიება დაავალა.
სტრასბურგის გადაწყვეტილებებზე ზედამხედველობის ორგანო, ევროსაბჭოს მინისტრთა კომიტეტი სინანულს გამოთქვამს ამ გამოძიების დროში გაჭიანურებისა და არაეფექტურობის გამო.
„ამიტომ კიდევ ერთხელ დაჟინებით მოვუწოდებთ ხელისუფლებას აჩვენონ თავიანთი მტკიცე ვალდებულება, ჩაატარონ სრულად ეფექტური გამოძიება, რათა დადგინდეს იმ პირთა ვინაობა და სისხლის სამართლის პასუხისმგებლობა, რომლებიც პასუხისმგებელნი არიან მე-18 მუხლის დარღვევის ყველა ასპექტზე“, – ნათქვამია განცხადებაში.
ევროსაბჭოს მინისტრთა კომიტეტი იქვე მიესალმება სახალხო დამცველის ჩართულობასა და თავად ვანო მერაბიშვილის წვდომას საქმის მასალებზე, მიუხედავად იმისა, რომ მას დაზარალებულის სტატუსი არ აქვს.
ევროსაბჭოს მინისტრთა კომიტეტი მოუწოდებს ხელისუფლებას განაგრძოს რეფორმები პროკურატურის დამოუკიდებლობის, ეფექტურობისა და ანგარიშვალდებულების გაზრდის მიზნით.