„51-მა დეპუტატმა უკვე მოგმართათ დეკემბრის ბოლოს უფლებამოსილების შეწყვეტის თაობაზე, ასე, რომ ქართული ოპოზიციის უმრავლესობა, ისევე როგორც მთლიანად საზოგადოების უდიდესი ნაწილი, ჩამოყალიბებულია მაზე, რომ ეს ერთპარტიული, მიტაცებული პარლამენტია”,- ასე პასუხობს „ევროპული საქართველოს“ ერთ-ერთი ლიდერი, გიგი უგულავა პარლამენტის თავმჯდომარის, არჩილ თალაკვაძის განცხადებას, სადაც ის აღნიშნავს, რომ ერთი კვირა რჩება, რათა ოპოზიციურმა პარტიებმა სადეპუტატო უფლებამოსილების შეწყვეტაზე საკუთარ გადაწყვეტილებებს და მოლაპარაკებების პირობებს გადახედონ და საბოლოო გადაწყვეტილება მიიღონ.

„ძალაუფლება მიტაცებულია, პარლამენტი არალეგიტიმურია და მისი ლეგიტიმაცია მორღვეულია ოპოზიციის ფლანგიდან და ოპოზიციური ამომრჩევლიდან, ისევე როგორც მორღვეულია „ქართული ოცნების“ ამომრჩევლისგან, მას შემდეგ რაც გაურკვეველი მიზეზებით სახლიდან გავიდა და აღარ დაბრუნდა მათი ლიდერი, ბიძინა ივანიშვილი. ამიტომ, საუბარი შეიძლება იყოს მხოლოდ და მხოლოდ რიგგარეშე არჩევნებზე. როდის შეიძლება ჩაინიშნოს, როდის შეიძლება იყოს ქვეყნისთვის ოპტიმალური. ეს უნდა იყოს საუბრის თემა. მეორე საუბრის თემა არის პლიტპატიმრები. პოლიტპატიმრების პირობებში არჩევნების ჩატარება ყოველთვის იქნება სათუო და კითხვის ნიშნების შემცველი. მესამე, საარჩევნო რეფორმაა. ეს არის საკითხები, რომლებზეც ჩვენ მზად ვართ მათ ვესაუბროთ. ექნებათ სურვილი ვისაუბრებთ, არ ექნებათ სურვილი და მათი ქმედებაა დარჩენილი, შეუძლია შეწყვიტონ უფლებამოსილება და ოფიციალურად გააფორმონ ერთპარტიული პარლამენტი და შესაბამისად, ორი ალუბალივით ედებათ ინჯია და ელისაშვილი“, – აცხადებს უგულავა.