ჩვენ არ გვინდა ქვეყნის უკუსვლა, სამწუხაროდ ასეთი ტენდენციები შეიმჩნევა. ჩვენ უნდა წავიდეთ წინ, ჩვენი ბავშვების და ჩვენი მომავალი თაობისათვის, – ამის შესახებ პარტია „საქართველოსთვის“ ლიდერმა, გიორგი გახარიამ ლანჩხუთის ახალი ოფისის გახსნისას განაცხადა.
მისი თქმით, ქვეყნის განვითარებისთვის საჭიროა, როგორც კეთილსინდისიერი ახალგაზრდები, ისე გამოცდილი პროფესიონალები.
„არავინ ვლანძღოთ, არავის ვეჩხუბოთ, არავის ვეომოთ – უბრალოდ ვიშრომოთ, ლანჩხუთის, გურიის და ამ ქვეყნის – ჩვენი სახელმწიფოს გაძლიერებისთვის – ეს არის ჩვენი მთავარი მიზანი“, – მიმართა გიორგი გახარიამ შეკრებილ მხარდამჭერებს.
პარტია „საქართველოსთვის“ ლიდერმა “ქართულ ოცნებაში“ დარჩენილ მეგობრებზეც ისაუბრა და აღნიშნა, რომ მათ ერთად ბევრი საქმე გააკეთეს, თუმცა ბოლო წლების მანძილზე ქვეყანა ერთ ადგილზე იდგა და ეს გახარიას გუნდისთვის მიუღებელი იყო.
მისი თქმით, „ოცნების“ ხელმძღვანელობიდან წამოსული ტენდენციები არათუ ერთ ადგილზე ტოვებს, არამედ უკან ხევს და წარსულში დაბრუნების საფრთხეს უქმნის ქვეყანას.
„ერთ ადგილზე დგომა იყო ბოლო რამოდენიმე წლის განმავლობაში ყველაზე დიდი გამოწვევა – ეს ჩვენთვის გაუგებარი იყო. ახლა ზოგიერთი ისე იქცევა, რომ, სამწუხაროდ, ჩემდა გულგასატეხად – უკვე წარსულშიც გვაბრუნებენ და ეს არ უნდა დავუშვათ! ოღონდ, კიდევ ერთხელ ვიმეორებ, მშვიდად, ჩვენს თანამოქალაქეებთან ერთად – არჩევნების გზით – ყველაფერი ისე უნდა გავაკეთოთ, ნაბიჯ-ნაბიჯ, როგორც ჩვენ შეგვეფერება“, – განაცხადა გახარიამ.
მისივე განმარტებით, მოქალაქეებს უნდა ესმოდეთ, რომ დღეს საქართველოში სამართლიანობის შეგრძნება იკარგება, რის აღდგენასაც მისი პარტია შეეცდება. გახარიამ ასევე აღნიშნა, რომ პარტიის და მხარდამჭერების მოქმედებები ყოველთვის უნდა იყოს მშვიდი და ღირსეული „ქართული ოცნების“ წარმომადგენლების მოქმედებების მიუხედავად.
„არ აქვს მნიშვნელობა, ჩვენ როგორ მოგვექცევიან, მთავარია ჩვენ ღირსება არ დავკარგოთ და ღირსებით, კეთილსინდისიერი პროფესიონალებით, ახალგაზრდებით, ჯერ დავიწყოთ ლანჩხუთში უფრო სწრაფი განვითარება და ყველამ ერთად უნდა მივხედოთ ამ ქვეყანას. ძლიერი რეგიონის გარეშე ძლიერი ქვეყანა არ არსებობს , ეს არის ყველაზე მნიშვნელოვან”, – განაცხადა გახარიამ.
გიორგი გახარიამ მხარდამჭერებს მიმართა, რომ მათი პასუხისმგებლობა მოსახლეობისთვის პარტიის პროგრამული ხედვების, ღირებულებების, გეგმების, მიზნების გაცნობაა, ხოლო მოქალაქეები თავად გადაწყვეტენ ვის მისცენ ხმა და როგორი მომავალი სურთ.
„უნდა დაველაპარაკოთ ჩვენს ლანჩხუთელებს, იმისთვის, რომ ავუხსნათ, რა არის ჩვენი მიზანი, ხოლო ვის მისცემენ ხმას – მათი გადასაწყვეტია. ჩვენ მხოლოდ ის უნდა გავაკეთოთ, რომ ხალხს ჩვენი გეგმა ავუხსნათ. მოვუყვეთ, სად და როგორ მივდივართ, რა არის ჩვენი ფასეულობები. მთავარია, რომ ჩვენ არ გვინდა ქვეყნის უკუსვლა და სამწუხაროდ ასეთი ტენდენციები შეიმჩნევა. ჩვენ უნდა წავიდეთ წინ, ჩვენი ბავშვების და ჩვენი მომავალი თაობისათვის“, – განაცხადა გახარიამ.
