„მინდა ვიყო კონკრეტული: – არანაირი კავშირი ივანიშვილს ან ნებისმიერ ჩვენთაგანს ან პოლიტსაბჭოს ან რომელიმე უწყებას გიორგი გახარიას მიერ გადადგმულ ნაბიჯებთან არ აქვს“,- ამის შესახებ უმრავლესობის წევრმა, გია ვოლსკიმ განაცხადა.
როგორც ვოლსკი ამბობს, გიორგი გახარიამ იმ მომენტში „ისუსტა“, როდესაც პრინციპული საკითხი იყო გადასაწყვეტი.
„გიორგი გახარიას გზავნილი იმის ხაზგასმად მივიღეთ, რომ ის აპირებს პოლიტიკაში აქტიურად იყოს ჩართული. ის თუ რას იზამს, არ ვიცით. რაც შეეხება საუბარს ევროპულ ინტეგრაციაზე, როგორ გგონიათ, სხვა რა უნდა ეთქვა?! არ უნდა ველოდოთ, რომ მისგან სხვა განცხადება იქნება გაკეთებული. რა თქმა უნდა, იტყვის, რომ მნიშვნელოვანია ევროპასთან ინტეგრაცია, ასოცირების პროცესის განვითარება. ეს თემებია პოპულარული. მიკვირს ეკონომიკაზე, რომ არ საუბრობს.
ფაქტია, რომ მას გამოცდილება “ქართული ოცნების” წიაღში, ჩვენს ფორმატში დაუგროვდა და თუ მას რამე წარმატებული პროექტი ჰქონდა, ეს პირადად მისი დამსახურება არ არის. პოლიტიკურ ველზე ახალი პოლიტიკური მოთამაშე შემოვიდა. ვნახოთ, რას იზამს, რას მოიმოქმედებს, რა გუნდს შექმნის და როგორ ჩამოყალიბდება. როცა სახელმწიფოში პრინციპული საკითხების გადაწყვეტის დრო იდგა, გიორგი გახარიამ საკმაოდ ისუსტა”, – განაცხადა გია ვოლსკიმ.
ცნობისთვის, ყოფილმა პრემიერ-მინისტრმა გიორგი გახარიამ გუშინ განაცხადა, რომ ის პოლიტიკიდან წასვლას არ აპირებს და საკუთარი გეგმების შესახებ მალე ისაუბრებს.
