საგარეო საქმეთა მინისტრმა, დავით ზალკალიანმა კომპანია „ფრონტერასთან“ დაკავშირებით ისაუბრა.
როგორც მან აღნიშნა, ეს არის საქართველოს ხელისუფლების მხრიდან კეთილი ნების გამოვლენა.
„სამართლებრივად ვიყავით ძალიან მყარი და გამოვავლინეთ კეთილი ნება იმისთვის, რომ ერთი კერძო, კომერციული დავა არ გახდეს სახელმწიფოთა შორის ურთიერთობების დამაზიანებელი ფაქტორი. ჩვენი გადაწვეტილება პირველ რიგში იმით იყო განპირობებული, რომ აღქმის შესაძლებლობაც არ დარჩეს ჩვენს სტრატეგიულ პარტნიორს საქართველოში საინვესტიციო გარემოსთან დაკავშირებით.
ფაქტია, რომ სამართლებრივად ჩვენი პოზიცია არის ძლიერი, რაც არის გამყარებული საერთაშორისო საარბიტრაჟო სასამართლოს გადაწყვეტილებით“, – განაცხადა დავით ზალკალიანმა.
ცნობისთვის, ეკონომიკის სამინისტრომ გაავრცელა განცხადება, რომლის მიხედვითაც მთავრობის გადაწყვეტილება კომპანია „ფრონტერას“ საშუალებას აძლევს, აღარ დახარჯოს ძალისხმევა ლობისტების მობილიზებასა და მათთან ურთიერთობაზე, რის ნაცვლადაც, სასურველია, კონცენტრირდეს იმ ვალდებულებების შესრულებაზე, რაც დასაქმებულ პირთა მიმართ დაუგროვდა, გაისტუმროს სახელფასო დავალიანებები, მოაწესრიგოს ურთიერთობა სხვა მრავალ კრედიტორთან და განაგრძოს საქმიანობა საძიებო სამუშაოების განხორციელების კუთხით.
