დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, ზუგდიდში კარანტინში მყოფის პირის გათავისუფლება მკაცრი წესების დაცვით მოხდა.
როგორც გამყრელიძემ აღნიშნა, ზუგდიდის შემთხვევასთან დაკავშირებით დეტალები დგინდება.
„ზუგდიდის შემთხვევაში არაფერი განსაკუთრებული არ მომხდარა. რაც შეეხება კარანტინიდან ადამიანის გათავისუფლებას, დეტალები დგინდება, იქ იყო უბედურება, ოჯახის ტრაგედია და გარკვეული წესების დაცვით, მკაცრი წესების დაცვით მოხდა ეს ყველაფერი“, – განაცხადა ამირან გამყრელიძემ.
შეგახსენებთ, რომ ზუგდიდში კორონავირუსის ერთი ახალი შემთხვევა გუშინ დადასტურდა. ინფიცირებული ლარსის სასაზღვრო პუნქტიდან 12 ივნისს შემოვიდა.
ის შემოსვლისთანავე გადაიყვანეს კარანტინში, სადაც PCR კვლევა ჩაუტარდა. უარყოფითი პასუხის შემდეგ ის დროებით გაათავისუფლეს კარანტინიდან, რადგანაც კაცს ძმა გარდაეცვალა. ის გასვენებაში ზუგდიდში იმყოფებოდა.
16 ივნისს ისევ ჩაუტარდა ხელახალი ტესტირება და რადგანაც შემთხვევა საეჭვო იყო, რუხის კლინიკაში გადაიყვანეს. ინფიცირებული მამაკაცის კონტაქტებიდან შვიდი პირი გადაყვანილია კარანტინში.
