საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა აკადემიკოს თამაზ გამყრელიძის სახელობის პრემია დააწესა. ინფორმაციას განათლების სამინისტრო ავრცელებს.
სამინისტროს ცნობით, თამაზ გამყრელიძის სახელობის პრემია ენათმეცნიერებაში განსაკუთრებული მიღწევებისა და წვლილისათვის გაიცემა. პრემიის მოსაპოვებლად კონკურსში მონაწილეობა ენათმეცნიერების მიმართულებით მოღვაწე დოქტორის ხარისხის მქონე საქართველოსა და უცხოეთის მოქალაქეებს შეეძლებათ. ხაზგასასმელია ისიც, რომ თვითონ კონკურსს სსიპ შოთა რუსთაველის საქართველოს ეროვნული სამეცნიერო ფონდი გაუწევს ორგანიზებას.
უნდა აღინიშნოს ისიც, რომ მიხეილ ჩხენკელის ინიციატივით, ივანე ჯავახიშვილის სახელობის თბილისის სახელმწიფო უნივერსიტეტში თამაზ გამყრელიძის სახელობის კაბინეტიც გაიხსნება, სტუდენტებისათვის კი, მისი სახელობის სტიპენდია დაწესდება.
„აკადემიკოსი თამაზ გამყრელიძე გახლდათ ევროპის აკადემიის პირველი ქართველი ნამდვილი წევრი, ასევე არჩეული იყო ბრიტანეთის, ავსტრიის, საქსონიის მეცნიერებათა აკადემიების, ამერიკის ხელოვნებათა და მეცნიერებათა აკადემიის უცხოელ საპატიო წევრად. ის წლების განმავლობაში იყო საქართველოს მეცნიერებათა ეროვნული აკადემიის პრეზიდენტი და მისი საპატიო პრეზიდენტი სიცოცხლის ბოლომდე. სამოცდაათწლიანი სამეცნიერო და პედაგოგიური მოღვაწეობის შედეგად ივანე ჯავახიშვილის სახელობის თბილისის სახელმწიფო უნივერსიტეტში მან არაერთი თაობა აღზარდა. იყო თბილისის სახელმწიფო უნივერსიტეტის რექტორი, ასევე მრჩეველთა საბჭოს წევრი.
თამაზ გამყრელიძემ უაღრესად მნიშვნელოვანი წვლილი შეიტანა ქართული სახელმწიფოებრიობის აღდგენისა და განვითარების საქმეში, სწორედ მან მოაწერა ხელი 1991 წლის 9 აპრილს სახელმწიფოებრივი დამოუკიდებლობის აღდგენის აქტს”” – წერია განცხადებაში.
შეგახსენებთ, რომ თამაზ გამყრელიძე მიმდინარე წლის 10 თებერვალს გარდაიცვალა.
