განათლების სამინისტრო ბრალდებებს პასუხობს და აცხადებს, რომ სამინისტროს მხრიდან არც ერთი დირექტორის გათავისუფლება არ მომხდარა. აქვე, პოლიტიკური ნიშნით ვინმეს გათავისუფლებას გამორიცხავენ.
„საქართველოს მასშტაბით საჯარო სკოლებში სამეურვეო საბჭოების მიერ არჩეულ დირექტორებს 2020 წლის სექტემბრიდან ეტაპობრივად ეწურებათ შრომითი ხელშეკრულების ექვსწლიანი ვადა. აღნიშნული ინფორმაცია საჯარო სკოლის ყველა დირექტორისთვის კარგად არის ცნობილი, რადგან დირექტორი არჩეულია ექვსი წლის ვადით.
სამინისტროს მხრიდან არ მომხდარა არც ერთი დირექტორის გათავისუფლება. ყველა მათგანს შესაძლებლობა აქვს მონაწილეობა მიიღოს სამინისტროს მიერ გამოცხადებულ საჯარო სკოლების დირექტორთა შესარჩევ კონკურსში.
შესაბამისად, სამინისტრო გამორიცხავს პოლიტიკური ნიშნით ვინმეს გათავისუფლებას“, – აცხადებენ სამინისტროში.
შეგახსენებთ, ვადის ამოწურვის მიზეზით, ქსნის საჯარო სკოლის დირექტორი, დოდო ჭოტორლიშვილი გაათავისუფლეს.
დოდო ჭოტორლიშვილის შვილი, ბექა ლელუაშვილი დედის გათავისუფლებას „ნაციონალურ მოძრაობასთან“ მის კავშირს ასახელებს. როგორც ბექა ლელუაშვილი ამბობს, აღნიშნული გადაწყვეტილების შედეგად, დოდო ჭოტორლიშვილის თბილისის საავადმყოფოში გადაყვანა გახდა საჭირო. როგორც ბექა ლელუაშვილი აცხადებს, დოდო ჭოტორლიშვილს ინფარქტის ნიშნები გამოუვლინდა.
