რუსი მესაზღვრეების მიერ 13 ივნისს საქართველო-რუსეთის საზღვრის დაღესტნის მონაკვეთზე გატაცებული ქართველი მწყემსი თავისუფალია. „პრაიმტაიმის“ ინფორმაციით, მწყემსი ქართულ მხარეს უკვე გადმოეცა.
ინფორმაცია შინაგან საქმეთა სამინისტროშიც დაგვიდასტურეს.
შეგახსენებთ, რომ 13 ივნისს სასაზღვრო პოლიციის ლაგოდეხის სამმართველოს მესაზღვრეებს, საქართველო-რუსეთის საზღვრის დაღესტნის მონაკვეთზე, დაუკავშირდა მწყემსი და აცნობა, რომ საქართველოს მოქალაქე, მწყემსი დ. ვ. სავარაუდოდ, რუსმა მესაზღვრეებმა დააკავეს საზღვრის კვეთის ბრალდებით.
„მომხდარ ფაქტთან დაკავშირებით მოხდა მყისიერი რეაგირება, მათ შორის ინციდენტის დეტალების დასადგენად.
პროცესში ჩართულია საქართველოს საგარეო საქმეთა სამინისტრო და შვეიცარიის საელჩოს საქართველოს ინტერესების სექცია. მიმდინარეობს აქტიური მოლაპარაკებები მწყემსის გადმოცემასთან დაკავშირებით და არსებული ინფორმაციით უახლოეს მომავალში მოხდება მწყემსის ქართული მხარისთვის გადმოცემა“, – აცხადებდნენ შსს-ში მწყემსის დაკავების შესახებ.
