ჩვენ შეგვიძლია ვთქვათ, რომ გიორგი კვინიტაძის ოცნება ახდა, საქართველო დამოუკიდებელი და თავისუფალი სახელმწიფოა, – ამის შესახებ საქართველოს პრემიერ-მინისტრმა ირაკლი ღარიბაშვილმა გენერალ გიორგი კვინიტაძის სამოქალაქო პანაშვიდზე, სიტყვით გამოსვლისას განაცხადა.
„გენერალი კვინიტაძე სამშობლოში დაბრუნდა. გიორგი კვინიტაძემ ჩვენი ქვეყანა 1921 წლის თებერვალში დაჭრილ იუნკრებთან ერთად დატოვა და რა სიმბოლურია, რომ 100 წლის შემდეგ ჩვენს სახელოვან გენერალს სამშობლოში, დამოუკიდებელ საქართველოში დაბადებული იუნკრები დახვდნენ, მას დახვდა ემიგრაციიდან დაბრუნებული საქართველოს პრეზიდენტი, სალომე ზურაბიშვილი. ჩვენ შეგვიძლია ვთქვათ, რომ გიორგი კვინიტაძის ოცნება ახდა, საქართველო დამოუკიდებელი და თავისუფალი სახელმწიფოა.
მაშინაც კი, როცა საქართველოში კომუნიზმის წითელი ტერორი მძვინვარებდა, გენერალ კვინიტაძეს სწამდა და სჯეროდა, რომ მისი სამშობლო თავისუფალი იქნებოდა, რადგან თავისუფლება და მისკენ სწრაფვა ჩვენი ერის სისხლშია გამჯდარი, არმია თავისი ხალხის თვისებების ანარეკლია, რადგან პირმშო ამ ხალხისა მისი სისხლი და ხორცი, ეს არის იმ ადამიანის სიტყვები, ვინც თავად იყო ამ დამოუკიდებელი არმიის ერთ-ერთი შემოქმედი, თავისი ხალხის შინაგანი ძლიერების თვალსაჩინო მაგალითი და ჩვენი ქვეყნის ღირსეული შვილი“, – განაცხადა ღარიბაშვილმა.
საქართველოს დამოუკიდებლობის დღეს გენერალ გიორგი კვინიტაძის ნეშტს სამშობლოში დაკრძალავენ.
