“ევროპული საქართველოს” წევრის, ლევან თარხნიშვილის განცხადებით, პარტიები “გირჩი” და “მოქალაქეები” “ქართული ოცნების” თამაშს თამაშობენ.

“რთულია არასერიოზული ხალხის არასერიოზულ განცხადებებზე პასუხი. ეს პირველი შემთხვევა არ არის როცა „გირჩი“ და ალეკო ელისაშვილი თამაშობენ „ქართული ოცნების“ თამაშს და ნებსით თუ უნებლიეთ მათ წისქვილზე ასხამენ წყალს.

არავის ეკითხება, ვის მიავლენს „ევროპული საქართველო“ მოლაპარაკებებზე. „ევროპული საქართველო“, ისევე როგორც ოპოზიციური პარტიების უმეტესი ნაწილი, რჩება თავის პოზიციაზე და ეს პოზიცია არის შემდეგი: პირველი – ვითხოვთ ახალ არჩევნებს, ეს არის ერთადერთი გამოსავალი არსებული კრიზისიდან, მეორე – ახალი არჩევნები, რომელიც უნდა ჩატარდეს თვისობრივად ახალ საარჩევნო გარემოში, მესამე – უნდა ჩაატაროს თვისობრივად ახალმა საარჩევნო ადმინისტრაციამ და მეოთხე – ვითხოვთ პოლიტპატიმრების უპირობო გამოშვებას. ეს არის ჩვენი დათქმები, სხვა ყველაფერში ამ ოთხი დათქმის შიგნით მზად ვართ ნებისმიერი მოლაპარაკებისთვის“, – განაცხადა ლევან თარხნიშვილმა.

შეგახსენებთ, 14 იანვარს “გირჩის” ერთ-ერთმა ლიდერმა იაგო ხვიჩიამ განაცხადა: „ახალი არჩევნები მოვითხოვოთ მაშინ, თუ ოპოზიცია ადგილობრივი თვითმმართველობის არჩევნებს მოიგებს“.