ცესკოსთან გამართულ აქციაზე სასაუბროდ „პრაიმტაიმნიუსი” ქართული ოცნების ერთ-ერთ ლიდერს გია ვოლსკის დაუკავშირდა.
როგორც ის აცხადებს, გუბაზისეული რევოლუცია საქართველოში არ მოხდება და პოლიცია დაიცვას ყველას, ვისაც დამარცხებას ჰპირდებიან…
„ცესკო აირჩიეს შეტევის ადგილად, მათთვის არასასიამოვნოდ მიდის პროცესები. მოხდა უპრეცედენტო რამ: 200-ზე მეტ უბანში უნდა ჩატარდეს მეორე ტური, სრულმასშტაბიანი საარჩევნო პროცესი გრძელდებოდა. გარდა ამისა, ბევრი უბანი გადაითვალა და ასევე, სასამართლომაც დაავალა კომისიას ხმების დათვლა და ახლაც მიმდინარეობს ეს პროცესი.
ეს დათვლა არაფერ სიკეთეს არ მოუტანს, რადგან ზუსტად იციან, რომ არჩევნები არ გაყალბებულა, აღმოჩნდა, რომ უმრავლესობას ხმები აქვს დაკლებული. დისბალანსი დარღვევა არ არის და არ მიუთითებს გაყალბებაზე. უბნების რაოდენობა, სადაც დისბალანსი იყო და დაითვალეს, 3-4 ხმით იყო დაკლებული, რაც შესაძლოა, იმით იყოს გამოწვეული, რომ ბიულეტინები ყუთებში არ ჩაყარეს, ეს განსაკუთრებით იმ ძალას ეხება, რომელიც რევოლუციას წინასწარ აცხადებს.
საქართველოს მთავრობამ, ცესკომ მაქსიმალურად გაითვალისწინა პრეტენზიები და მიმდინარეობს დემოკრატიულ სამყაროში მიღებული პროცესი. ოპოზიციას უნდა გადაეფარა აქციით, რომელსაც შესაძლოა, შეცდომაში შეყვანილი პირები ესწრებიან.
საქართველოში გუბაზისეული რევოლუცია საქართველოში არ მოხდება, ახლა მიდიან უკანასკნელ შესაძლო ზომებზე, რომლებმაც შესაძლოა, არ ჩაშალოს სააკაშვილის დასახული გეგმა.
ცესკოს ბლოკირების თაობაზე განცხადება ოპოზიციამ გააკეთა, განახორციელეს ანტიკონსტიტუციური მოქმედებები. პოლიცია ვალდებულია იმოქმედოს შესაბამისად. ახლა, შსს-ზე მიმდინარეობს მთავარი დაწოლა და პოლიციელები, რომლებიც დგანან თავიანთი ქვეყნის სიყვარულით, შეტევის მთავარი ობიექტები არიან.
გვახსოვს ფარული ჩანაწერები, რომლიც ავთენტურობაში ეჭვი არ მეპარება. რა უნდა ექნათ მათ, როცა შეტევა რეალურია?!
– რამდენად რეალისტურია, თუნდაც ცესკოში შეჭრით გუბაზისეული რევოლუცია განხორციელებულიყო?
– თქვენთან სახლში რომ შემოიჭრან, პოლიციამ ისიც უნდა აღკვეთოს, ისევე როგორც – კერძო ან სახელმწიფო დაწესებულებაში.
– რამდენად პროპორციული იყო გამოყენებული ძალა?
– როცა ადამიანთა ჯგუფი ამბობს, რომ უნდა დაგამარცხოთ, პოლიცია ვალდებულია დაგიცვათ არ დაელოდნენ ჯებირების გადანგრევას…
– გადამეტებული ძალა ხომ არ იყო გამოყენებული სამართალდამცველების მხრიდან?
– არ მომწონს ეგ შეკითხვა. მე სიტუაციას ვხატავ და შეფასება მკითხველმა გააკეთოს.
ცნობისთვის, 8 ნოემბერს, პარლამენტთან მიმდინარე აქციაზე ნიკა მელიამ დემონსტრანტებს მოუწოდა ცესკოსთან გადასულიყვნენ.
„ვერავინ იქ ვეღარ შევა, ვერავინ იქიდან ვეღარ გამოვა“, – განაცხადა მელიამ.
აქციის მონაწილეებმა ცესკოს შენობაში შესვლა სცადეს. გავრცელდა კადრები, რომელშიც ჩანს, როგორ ცდილობენ აქტივისტები ჯებირების მორღვევას. სიტუაცია კიდევ უფრო დაიძაბა, რაც ადგილზე სპეცრაზმი გამოჩნდა და მათი დაშლა დაიწყო. ცესკოსთან პოლიციამ მომიტინგეების მისამართით წყლის ჭავლი გამოიყენა.
