ინფრასტრუქტურის მინისტრი, მაია ცქიტიშვილი აცხადებს, რომ 12 ნოემბერს, საქართველოსა და ჩრდ. მაკედონიის მატჩი გულშემატკივრის დასწრების გარეშე გაიმართება.
როგორც ცქიტიშვილი განმარტავს, ეს ყველაფერი გამოწვეულია ეპიდემიოლოგიური სიტუაციიდან გამომდინარეობს.
„პრაიმტაიმნიუსის“ კითხვაზე, იმის გათვალისწინებით, რომ ამჟამად პოლიტიკური პროცესები აქტიურად მიმდინარეობს, შეძლებს თუ არა მატჩზე დასწრებას გულშემატკივარი, მაია ცქიტიშვილმა უპასუხა:
„იმის გამო, რომ ჩვენ არ შეგვიძლია პოლიტიკური პროცესის შეზღუდვა და აკრძალვა, ასე აქტიურად მოვუწოდებთ ყველას, რომ წესები დაიცვან, მაგრამ როდესაც ვსაუბრობთ ფეხბურთზე ან კულტურულ ღონისძიებებზე, ეს არის ის, რისი შეზღუდვაც არის შესაძლებელი იმის გათვალისწინებით, რომ ასეთი მძიმე ფონი გვაქვს.
სამწუხაროდ, დღეის მდგომარეობით, ჩვენ მოგვიწევს ამ მატჩის ჩატარება გულშემატკივრების გარეშე და მოდი ყველამ ერთად გამოვიჩინოთ პასუხიმგებლობა და ჩვენს ფეხბურთელებს „უბალერშიკოთ“ სახლებიდან. დარწმუნებულ ვარ, ამით ისინი უარესად არ ითამაშებენ“,- განაცხადა მაია ცქიტიშვილმა.
ცნობისთვის, 12 ნოემბერს საქართველოს ფეხბურთელთა ნაკრები ჩრდ. მაკედონიას შეხვდება. გამარჯვების შემთხვევაში საქართველოს ევროპის ჩემპიონატზე იასპარეზებს.
