კობახიძემ თქვა, რომ დეპუტატები თუ დაწერენ განცხადებას მანდატების შეწყვეტაზე, მაშინ შევუწყვეტთო, რასაც ვეთანხმები, – ამის შესახებ ჟურნალისტებს “ლელოს” ოფისში ოპოზიციური პარტიების ლიდერების შეხვედრების დაწყებამდე “გირჩის’ ერთ-ერთმა ლიდერმა იაგო ხვიჩიამ განუცხადა.
მისივე თქმით, საგამოძიებო კომისიის შექმნა, ირაკლი კობახიძეს ოპოზიციისთვის პარლამენტში შესვლის სანაცვლოდ არ შეუთავაზებია და კომისიის შექმნის იდეა კარგია.
„ზოგადად საგამოძიებო კომისიის იდეა კარგია, როგორც გამოსავალი, მაგრამ ამ კომისიას უნდა ჰქონდეს ნდობა და იმისთვის, რომ საგამოძიებო კომისიას ჰქონდეს ნდობა, უნდა იყოს კონსესუსის შედეგად შექმნილი და არ უნდა იყოს ცალმხრივი, სადაც ერთი პარტია არის ყველაფერი. ამიტომ გააჩნია, როგორ მივალთ ამ წინადადებამდე, მაგრამ თავად წინადადებაში, რომ საგამოძიებო კომისიით რაღაცებზე ვილაპარაკოთ, უაზრობა არ არის. უბრალოდ, გააჩნია როგორ გავაკეთებთ ამას. საგამოძიებო კომისიის შექმნა ირაკლი კობახიძეს პარლამენტში შესვლის სანაცვლოდ არ შემოუთავაზებია, სანაცვლოდ შემოთავაზებულია სხვა რაღაცები, რომელიც მოლაპარაკების მაგიდაზე დევს”, – განაცხადა იაგო ხვიჩიამ.
ცნობისთვის, „ქართულ ოცნების” აღმასრულებელმა მდივანმა ირაკლი კობახიძემ განაცხადა, რომ ყველა დეპუტატს უფლებამოსილება შეუწყდება, რომელიც განცხადებით მიმართავს, მაგრამ დაფინანსებასა და სხვა პრივილეგიებს ვერ მიიღებენ პარტიები, რომლებიც პარლამენტში არ იქნებიან.
