თბილისის ინფექციური საავადმყოფო აივ/შიდსით ინფიცირებულ პაციენტებს, დაახლოებით სამ კვირაში მიიღებს. ამის შესახებ ინფექციური საავადმყოფოს სამედიცინო დირექტორმა, მარინა ეზუგბაიამ განაცხადა.
მისი თქმით, პაციენტების მიღება ეტაპობრივად განხორციელდება.
„იცით, რომ რამდენიმე სერვისი უნდა აღვადგინოთ. სასიცოცხლო მნიშვნელობის სამუშაოები, რაც ამ 300 000 ლარს მოითხოვდა, უკვე დაწყებულია. თავდაპირველად პაციენტების მიღება აღდგება იმ კორპუსში, სადაც მხოლოდ ჟანგბადის სისტემის უზრუნველყოფაა საკმარისი. სამ კორპუსში უნდა ჩატარდეს ასეთი სამუშაოები და ამას, ალბათ, დასჭირდება სამი-ოთხი დღე. სადღაც მეხუთე-მეექვსე დღეს პაციენტების მიღება უკვე შესაძლებელი იქნება.
დანარჩენ კორპუსებში, ჟანგბადთან ერთად აღსადგენია ისეთი სერვისები, როგორიცაა: ვენტილაცია, იქ დამიწებაა გასაკეთებელი და ზოგიერთ პალატაში კიდევ რემონტია ჩასატარებელი. ეს ყველაფერი ეტაპობრივად იქნება, მაგრამ საერთო ჯამში, ალბათ, მაქსიმუმ სამი კვირის ხანგრძლივობა დაგვჭირდება. მაქსიმალურად სწრაფად გვინდა ამ ყველაფრის გაკეთება. იმედია, რომ ოთხ-ხუთ დღეში ერთი კორპუსი დაგვიბრუნდება, სადაც განვახორციელებთ პაციენტების მიღებას“, – განაცხადა მარინა ეზუგბაიამ.
ცნობისთვის, 20 აგვისტოს თენგიზ ცერცვაძემ განაცხადა, რომ სასიცოცხლოდ მნიშვნელოვანი პირობების არქონის გამო საავადმყოფომ კოვიდ და აივ ინფიცირებული პაციენტები მიღება შეწყვიტა.
