საქართველოში კორონავირუსის მორიგი რეკორდული მაჩვენებელი – 919 ახალი შემთხვევა დაფიქსირდა. კორონავირუსის პანდემიის გამო, გეგმავს თუ არა ხელისუფლება ქვეყანაში მკაცრი რეგულაციების დაწესებას, ამ და სხვა საკითხზე „პრაიმტაიმნიუსთან“ პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ დიმიტრი ხუნდაძემ ისაუბრა.
დიმიტრი ხუნდაძე: ქვეყანაში შექმნილი ეპიდვითარება თანხვედრაშია გლობალურად მსოფლიოში განვითარებულ ეპიდსიტუაციასთან. საქართველოში პროგნოზირებადი იყო მეორე ტალღა, რაც უკვე რეალობად იქცა.
ჩვენ არაერთხელ განგვიცხადებია, რომ როგორც ყველა ქვეყანა, ჩვენც ვემზადებოდით პანდემიისთვის, დღეს უფრო მეტად ვართ მზად, ვიდრე აქამდე.
ქვეყანაში ინფიცირებულთა რაოდენობა იზრდება, მაგრამ შიშის ეფექტი ნაკლებია, ეს არ ნიშნავს, რომ თავს უნდა მივცეთ ზედმეტი თავისუფლება და რეგულაციები არ დავიცვათ.
– კორონავირუსის 919 ახალი შემთხვევის დაფიქსირება არის თუ არა საფუძველი, რომ ქვეყანაში შეზღუდვები დაწესდეს?
– მინდა გითხრათ, რომ ასეთი ნახტომისებური ზრდა არის პირდაპირი ანარეკლი აჭარაში განვითარებული მოვლენებისა, მაგრამ პანიკის საფუძველი ნამდვილად არ არსებობს. ამ მზარდი ვითარებიდან გამომდინარე, ჩაკეტვები ნამდვილად არ იგეგმება, თუმცა იქნება ლოკალური შეზღუდვები, სადაც ამის საჭიროება იქნება.
მეტსაც გეტყვით, ჩვენ ვგეგმავთ, რომ ზოგიერთ ქვეყანასთან ფრენების აღდგენაც კი დავიწყოთ, რა თქმა უნდა, შესაბამისი რეგულაციების დაცვით. რომელ ქვეყნებთან, მომავალში გახდება ცნობილი.
მაგალითად, თუ კონკრეტულ ლოკაციაზე გამოიკვეთა ეპიდვითარების გაუარესება და არის ჭარბი კონტაქტები, მოხდება წერტილოვანი შეზღუდვები, ანუ რომელიმე ობიექტი, შესაძლოა, იყოს გადაყვანილი იზოლაციის რეჟიმში.
– ლოკალური შეზღუდვების პარალელურად, განიხილავს თუ არა უჭყებათაშორისი საბჭო თბილისში ტრანსპორტის შეზღუდვის საკითხს?
-ამ ეტაპზე, თბილისში საზოგადოებრივი ტრანსპორტის შეზღუდვის საჭიროებას ვერ ვხედავთ. ეპიდვითარება არის მზარდი, თუმცა ჩვენ ველოდებით, რომ გარკვეული პიკური ზრდის შემდეგ, იქნება კლება. ყველა გადაწყვეტილება იქნება ეპიდვითარებიდან გამომდინარე და ეპიდემიოლოგებთან შეთანხმებით.
– ემუქრება თუ არა საფრთხე არჩევნების ჩატარებას?
– არჩევნების ჩატარებას საფრთხე არ ემუქრება. მოსახლეობის ჯანმრთელობის დაცვა ჩვენი ვალდებულებაა, ასევე, უპირატესია ეკონომიკის დაცვაც მძიმე კრიზისისგან. ჩვენ გვაქვს წინ პოლიტიკური პროცესი, და ყველამ უნდა გავაკეთოთ ისე, რომ არჩევნების შემდეგ დამატებითი პრობლემები არ შეიქმნას.
ავტორი: ეკატერინე ზარნაძე
