აშშ-ს ელჩის რეზიდენციაში გამართული შეხვედრის შემდეგ, რომელსაც „ქართული ოცნებისა“ და ოპოზიციური პარტიების ლიდერები იმყოფებოდნენ, მედიასთან კომენტარი „პატრიოტთა ალიანსის“ ლიდერმა ირმა ინაშვილმაც გააკეთა.
მისი თქმით დიალოგს არ აქვს ალტერნატივა და კარგი იქნება, თუ პოზიტიური შეთანხმებით დამთავრდება ეს შეხვედრები.
„მნიშვნელოვანია, რომ დღევანდელი შეხვედრა შედგა. ჩვენ მოვისმინეთ არჩილ თალაკვაძის პოზიციაც. მე არ მაქვს პრობლემა, რომ არჩილთან მქონდეს კომუნიკაცია და მუდმივად ვართ ჩვენ ხაზზე, როგორც პარლამენტის თავმჯდომარე და პარლამენტის თავმჯდომარის მოადგილე.
თავისთავად, შეხვედრა რომ შედგა, ეს ძალიან მნიშვნელოვანი და კარგია. ვნახოთ, ახლა როგორ წარიმართება პროცესი. დეტალებზე არ ვისაუბრებ, რადგან დეტალებზე საუბარი ნაადრევია და არ არის კორექტული. ამიტომ, დაველოდოთ მოვლენების განვითარებას.“ – განაცხადა ირმა ინაშვილმა.
