იურიდიულ საკითხთა კომიტეტზე მეორე მოსმენით მხარი დაუჭირეს საარჩევნო კოდექსში შესატან ცვლილებებს.
კანონპროექტის ინიციატორი საქართველოს პარლამენტის წევრები რატი იონათამიშვილი და გურამ მაჭარაშვილი არიან.
კანონპროექტის მიხედვით, საარჩევნო დარღვევებზე სანქციები მკაცრდება. კერძოდ, ამომრჩევლის იძულების, დაშინებისა და ხმის მიცემის ფარულობის დარღვევის ფაქტებზე სისხლის სამართლის პასუხისმგებლობა იქნება გათვალისწინებული.
კანონპროექტში აღნიშნულია, რომ არჩევნების შედეგებზე არამართლზომიერი ზეგავლენის (მათ შორის, ხმის მიცემის ფარულობის დარღვევის) მიზნით, ამომრჩევლის დაშინება ან იძულება, მათ შორის, ჩადენილი ამომრჩევლის, მისი ოჯახის წევრის ან ახლო ნათესავის მიმართ სიცოცხლის მოსპობის, ჯანმრთელობის დაზიანების, ქონების განადგურების ან დაზიანების მუქარით, ან მატერიალური, სამსახურებრივი ან სხვაგვარი დამოკიდებულების გამოყენებით, დაისჯება ჯარიმით ან შინაპატიმრობით ვადით ექვსი თვიდან ორ წლამდე, ან თავისუფლების აღკვეთით ვადით სამ წლამდე.
