ჯანდაცვის მსოფლიო ორგანიზაციის ხელმძღვანელის, ტედროს ადჰანომ გებრეიესუსის განცხადებით,  ზედიზედ მერვე კვირაა, რაც მსოფლიოში კორონავირუსის შემთხვევების რაოდენობა იმატებს.

ინფორმაციას ამის შესახებ CNN-ი ავრცელებს.

„ზედიზედ მე-8 კვირაა, რაც მსოფლიოში კოვიდის ახალი შემთხვევების რაოდენობა იზრდება. გასულ კვირას, 5.2 მილიონზე მეტი ახალი შემთხვევა დაფიქსირდა, რაც რეკორდული მაჩვენებელია“, – განაცხადა გებრეიესუსმა.

მისივე თქმით, ბოლო 5 კვირაა კორონავირუსით გარდაცვლილთა მაჩვენებელიც გაიზარდა. ასევე,  25-დან 59 წლამდე ასაკის ადამიანებში ინფიცირებისა და ჰოსპიტალიზაციის მაჩვენებელი საგანგაშო ტემპით იმატებს.

ცნობისთვის, მსოფლიოში კორონავირუსით ინფიცირებულთა საერთო რაოდენობამ 142 მილიონს გადააჭარბა.