მსოფლიო ჯანდაცვის ორგანიზაციის ექსპერტთა ჯგუფმა შეისწავლა ოთხი პოტენციური ჰიპოთეზა, თუ როგორ შეიძლებოდა ვირუსი Sars-Cov-2 ადამიანის ორგანიზმში მოხვედრილიყო. ამის შესახებ უხანში გამართულ პრესკონფერენციაზე ჯანმოს საერთაშორისო ექსპერტების ჯგუფის ხელმძღვანელმა, პიტერ ბენ ემბარეკმა განაცხადა.
„ჩვენ წამოვწიეთ ოთხი ჰიპოთეზა, თუ როგორ შეიძლებოდა ვირუსი ადამიანის ორგანიზმში მოხვედრილიყო.
პირველი – ეს არის ცხოველიდან ადამიანზე პირდაპირი გადაცემა.
მეორე ჰიპთეზის მიხედვით – ვირუსი ადამიანს შეიძლებოდა შუალედური ცხოველისგან გადასცემოდა, რომელიც ახლოს იყო მასთან და ამ ცხოველში ვირუსი ადაპტირდებოდა და ცირკულირებდა ადამიანზე გადაცემამდე.
მესამე ვერსიაა – პროდუქტების ჯაჭვი, განსაკუთრებით კი გაყინული პროდუქტების, რომლის ზედაპირი შეიძლებოდა ყოფილიყო ვირუსის გადაცემის წყარო, ან კიდევ მისგან დამზადებული საკვები.
მეოთხე ვერსია – უკავშირდება ლაბორატორიასთან დაკავშირებულ შესაძლო ინციდენტს“, – განაცხადა მან.
ემბარეკი აცხადებს, რომ ექსპერტებმა ოთხივე ჰიპოთეზა დაწვრილებით შეისწავლეს და უფრო მეტად სარწმუნოდ მიიჩნევენ ვერსიას, რომელიც შუალედურ ცხოველს უკავშირდება.
რაც შეეხება ვერსიას გაყინულ პროდუქტებთან დაკავშირებით, ის იძლევა ვარაუდის შესაძლებლობას, რომ ვირუსი შორი მანძილიდან იყო ტრამპორტირებული.
ექსპერტები ამ ეტაპზე ყველაზე ნაკლებად სარწმუნოდ მიიჩნევენ ლაბორატორიაში შესაძლო ინციდენტთან დაკავშირებულ ვერსიას.
ჯგუფი კვლევას კვლავაც განაგრძობს.
