ორშაბათს “ინსტაგრამზე” პირდაპირი ეთერის დროს ჩეჩნეთის მეთაურს კომენტარებში “შეითანი“(ეშმაკი) უწოდეს, რის გამოც რამზან კადიროვი კომენტარის ავტორს ანგარიშსწორებით დაემუქრა.
“თუ ეს მე დამიწერე გიპოვი და გაჩვენებ ვინაა ჩვენ შორის “შეითანი“. როგორ არ გრცხვენია, სარკეში როგორ ჩაიხედები. ღამით ვეღარ დაიძინებ და ანდერძის წერას დაიწყებ “თუ მოვკვდები დაეხმარეთ ჩემს ოჯახს…” გამომიგზავნე შენი მონაცემები, მე ბევრი “შეითანი” გამინადგურებია და შენც გაგანადგურებ,” – მიმართავდა რამზან კადიროვი კომენტარის ავტორს და თან იცინოდა.
კადიროვის მორიგ მუქარაზე ყურადღება ბლოგერმა ტუმსო აბდურახმანოვმა გაამახვილა და ინსტაგრამის პირდაპირი ეთერის ვიდეო საკუთარ ტელეგრამ- არხზე გაავრცელა.
აბდურახმანოვი კადიროვის ერთ-ერთი ყველაზე ცნობილი კრიტიკოსია. ის ამჟამად შვედეთში ცხოვრობს, გასულ წელს მას კრიტიკის გამო თავს დაესხნენ.
ანგარიშსწორებასთან დაკავშირებით მსგავსი მუქარები კადიროვის მხრიდან ხშირია, ის არაერთხელ დაემუქრა ჟურნალისტებს და უფლებადამცველებს. ხშირ შემთხვევაში მუქარა განხორციელებულა კიდეც.
