დაავადებათა კონტროლის ცენტრის კახეთის განყოფილებაში ინფიცირებულთა რაოდენობის კლებას დაწესებულ შეზღუდვებს უკავშირებენ.

ცენტრის ხელმძღვანელი, ნელი ხიზანიშვილი განმარტავს, რომ აკრძალვებმა და პირბადეების მოხმარებამ ინფიცირებულთა რაოდენობაზე გავლენა მოახდინა.

„დღეს ვირუსის 28 ახალი შემთხვევა გამოვლინდა. შეზღუდვები თავისას აკეთებს, სადღესასწაულო დღეების შემდეგ თითქოს მატებას ველოდებოდით, მაგრამ გარკვეული კლებაა. პირბადეების მოხმარება გაზრდილია და როგორც ჩანს, მოქალაქეები მობილიზებულები არიან. იმედი მაქვს, სტაბილიზაციას შევინარჩუნებთ“,- განაცხადა ხიზანიშვილმა.

მთლიანად კახეთის რეგიონში დღევანდელი მდგომარეობით, კორონა ვირუსის 9511 შემთხვევაა გამოვლენილი. აქედან ყველაზე მეტი, 2206 თელავში, ხოლო ყველაზე ნაკლები – 659 ახმეტაში  ფიქსირდება.

ამ ეტაპზე მკურნალობას  1992 მოქალაქე გადის, მათ შორის 1851 ბინაზე,  2 იმყოფება კოვიდ – სასტუმროში, ხოლო 139  პაციენტი კოვიდ-კლინიკაშია გადაყვანილი.

სექტემბრიდან დღემდე, რეგიონში  7408 პაციენტი გამოჯანმრთელდა,  გარდაიცვალა 83.

ავტორი: ხათუნა გულიაშვილი