თელავის, ახმეტისა და გურჯაანის მუნიციპალიტეტებში კორონავირუსით ინფიცირებული ექიმის 19 კონტაქტი გამოვლინდა, – ამის შესახებ დაავადებათა კონტროლის ცენტრის კახეთის განყოფილების ხელმძღვანელის, ნელი ხიზანიშვილმა განაცხადა.
მისი განმარტებით, ყველა მათგანი, ინფიცირებული პირის, ახლონათესაური და სამსახურებრივი კონტაქტია.
„პაციენტი არის თბილისში მცხოვრები ექიმი-ანგიოლოგი, რომელიც თბილისის რამდენიმე კლინიკაში მუშაობს. მას აქვს სახლი, ახმეტის მუნიციპალიტეტის სოფელ აწყურში. მან თავად გაიხსენა ყველა, ნათესავი და თანამშრომელი, ვისთანაც ჰქონდა ურთიერთობა. ყველა ანალიზი აღებულია და ლაბორატორია „ციტოშია“ გადაგზავნილი. ეპიდემიოლოგები მუშაობას აგრძელებენ“, – განაცხადა ხიზანიშვილმა.
ინფიცირებული ექიმი თელავის რეფერალური საავადმყოფოს კონსულტანტიცაა, თუმცა, მას თანამშრომლებთან კონტაქტი არ ჰქონია.
შეგახსენებთ, ბიოლოგიური მასალა, რომელიც რესპირატორული სიმპტომების მქონე ექიმს აუღეს, დაავადებათა კონტროლის თელავის ცენტრის ლაბორატორიაში, 8 სექტემბერს შევიდა.
ტესტირებამ ჯინექსპერტის მეთოდით, პაციენტს კორონავირუსი დაუდასტურა.
დაავადებათა კონტროლის ცენტრის თელავის ლაბორატორიაში, მითითებული მეთოდით, უკვე 23 ტესტი ჩატარდა.
თბილისელი ექიმის დადატურებული შემთხვევა, უკვე გამოკვლეული პირებიდან, პირველია.
ავტორი: ხათუნა გულიაშვილი
