კახეთში სტიქიით დაზარალებული მოსახლეობის დახმარების ფორმაზე უახლოეს პერიოდში საქართველოს მთავრობა იმსჯელებს. ამის შესახებ კახეთის გუბერნატორმა, ირაკლი ქადაგიშვილმა, მედიასთან, სტიქიის საკითხზე შეხვედრის დროს განაცხადა.
„დაზიანებული სასოფლო-სამეურნეო სავარგულების შესახებ, ადგილობრივი ხელისუფლება კონკრეტულ ინფორმაციას ადგილზე შეაჯამებს და მთავრობას გაუგზავნის. ამ ეტაპზე თელავის , ყვარლისა და გურჯაანის მუნიციპალიტეტებში ინტენსიური რეჟიმით მიმდინარეობს იმ ფერმერებისა და მევენახეების აღწერა, რომლებიც სადაზღვეო სისტემაში ჩართული არ არიან. დღეს, ჩვენ, სოფლის მეურნეობის სამინისტროს შესაბამის რეგიონულ უწყებასთან ერთად ვაწარმოებთ დეტალურ შესწავლას თითოეული ფიზიკური პირის და მისი სასოფლო-სასამეურნეო სავარგულის რაოდენობის აღწერას. ეს ინფორმაცია, რამდენიმე დღეში, სრულყოფილად იქნება შეკრებილი და მთავრობას ექნება საშუალება მიიღოს შემდგომი გადაწყვეტილებები, თუ რა მიმართულებით იმოქმედებს,“ – განაცხადა ქადაგიშვილმა
შეგახსენებთ, სტიქიის შედეგად, კახეთის რეგიონში დაზიანებულია ოთხი ათას ჰექტარზე მეტი სასოფლო- სამეურნეო სავარგული, 112 საცხოვრებელი სახლი და დაგლეჯილია მრავალწლოვანი ხეები.
კახეთში სტიქიით დაზარალებულთა დახმარების თაობაზე, დღეს, პრემიერ- მინისტრმა, გიორგი გახარიამაც ისაუბრა.
ავტორი: ხათუნა გულიაშვილი
