არჩევნების თარიღის შესაძლო გადაწევაზე საუბრები უკავშირდება მთავრობის გეგმას კორონავირუსის შესაძლო მეორე ტალღასთან დაკავშირებით, როგორც ამას სხვა ქვეყნების მთავრობები განიხილავენ, რადგან პანდემიის გამო უპრეცედენტო დროა, – ასეთი კომენტარი გააკეთა აშშ-ის ელჩმა, კელი დეგნანმა საქართველოში საპარლამენტო არჩევნების თარიღთან დაკავშირებით.
როგორც ელჩმა აღნიშნა, საქართველოსთვის ეს არის შანსი, კიდევ ერთხელ აჩვენოს მსოფლიოს, რომ ქვეყანამ დიდ პროგრესს მიაღწია და ყველა მომდევნო არჩევნები უკეთესია, ვიდრე წინა.
„ახლა პარლამენტი განიხილავს მნიშვნელოვან საარჩევნო რეფორმას და საკონსტიტუციო ცვლილებებს. ეს არის კიდევ ერთი შესაძლებლობა ქვეყნისთვის, ჩატარდეს თავისუფალი, სამართლიანი და სანდო არჩევნები ამ არაორდინარულ ვითარებაში. როგორც მე ვიცი, არჩევნების თარიღი არ არის დანიშნული.
თარიღის შესაძლო გადაწევასთან დაკავშირებით საუბრები უკავშირდება მთავრობის გეგმას კორონავირუსის შესაძლო მეორე ტალღასთან დაკავშირებით, როგორც ამას სხვა ქვეყნების მთავრობები განიხილავენ, რადგან პანდემიის გამო უპრეცედენტო დროა. მიუხედავად ამისა, დარწმუნებული ვარ, ყველაფერი გაკეთდება, რათა არჩევნები თავისუფალ და სანდო გარემოში ჩატარდეს და ყველა ქართველის ხმა ისმოდეს პარლამენტში. ეს არის ის, რაც ქართველებს სურთ“, – განაცხადა აშშ-ის ელჩმა.
