ხელვაჩაურის მუნიციპალიტეტის მერი ჯუმბერ ვარდმანიძე მახინჯაურში სამსართულიანი სახლის უკანონო მშენებლობისთვის მერიის მუნიციპალურმა ინსპექციამ 6000 ლარით დააჯარიმა.
„მახინჯაურის დასახლებაში, თამარ მეფის პირველი შესახვევის 27 ნომერში, უნებართვოდ მრავალფუნქციური ობიეტის მშენებლობასთან დაკავშირებით საქმის წარმოება გრძელდება. ვინაიდან მშენებელმა კანონის შესაბამისად მითითების ვადადაში ვერ წარმოადგინა შესაბამისი დოკუმენტაცია სამსახურმა გამოსცა კანონის შესაბამისად დაჯარიმების შესახებ დადგენილება“, – აცხადებენ მუნიციპალურ ინსპექციაში.
როგორც ხელვაჩაურის მერმა ჯუმბერ ვარდმანიძემ „პრაიმტაიმნიუს“, განუცხადა, ჯარიმას აუცილებლად გადაიხდის და არანაირი პრეტენზია დაჯარიმებასთან დაკავშირებით არ გააჩნია.
„ ჯარიმას, რა თქმა უნდა, აუცილებლად გადავიხდი. ჩემს საკუთრებაში არსებულ მიწის ნაკვეთზე დავიწყე სახლის მშენებლობა და არ მქონდა ნებართვა, ამიტომ დამაჯარიმეს.
ამ ეტაპზე ყველა დოკუმენტი წესრიგშია, მშენებლობის ნებართვაც მაქვს“ – განაცხადა ჯუმბერ ვარდმანიძემ.
