ხულოს მუნიციპალიტეტში ხანძრის შედეგად სკოლა დაიწვა.
შემთხვევა დღეს საღამოს მოხდა.
სოფელ კალოთას ერთსართულიანი ხის შენობა, სადაც 14 მოსწავლე სწავლობს, მთლიანად დაიწვა.
საგანგებო სიტუაციების მართვის სამსახურის ინფორმაცით, შემთხვევის შედეგად არავინ დაშავებულა.
„ხანძარი ამ ეტაპზე ლოკალიზებულია. ადგილზე სამი სახანძრო ეკიპაჟი მუშაობს. ცეცხლი გვერდით მდებარე შენობებზე არ გავრცელებულა, ხანძრის შედეგად არავინ დაშავებულა”- აცხადებენ უწყებაში.
როგორც ადგილობრივები აცხადებენ, სახანძრო-სამაშველო ეკიპაჟებს მისვლა დააგვიანდათ.
„დააგვიანეს მოსვლა, საკუთარი ძალებით ვცდილობდით ჩაქრობას. გვერდით რამდენიმე სახლია, იმათაც საფრთხე ემუქრებოდათ. ერთ სახლზე თითქმის გადავიდა ცეცხლი. ჩვენ რომ არა, ისიც დაიწვებოდა. ადგილობრივებმა შევძელით ცეცხლის გავრცელების შეჩერება, თუმცა სკოლის შენობა დაიწვა და სახანძრო მერე მოვიდა”- აცხადებს ერთ-ერთი ადგილობრივი.
ჩვენს კითხვაზე, დააგვიანეს თუ არა მისვლა ხანძრის ადგილას სახანძრო-სამაშველო ეკიპაჟებმა, საგანგებო სიტუაციების მართვის სამსახურის საზოგადოებასთან ურთიერთობის სამსახურში გვითხრეს, რომ ამ ეტაპზე კომენტარს ვერ გააკეთებენ.
როგორც ხულოს რესურსცენტრის დირექტორი ედუარდ მიქელაძე “პრაიმტაიმთან” აცხადებს, ხვალ სასწავლო პროცესი აღნიშნული სკოლის მოსწავლეებისთვის განათლების მინისტრთან შეთანხმებით ონლაინ რეჟიმში გაიმართება, მაქსიმუმ ზეგიდან კი შეძლებენ მოსწავლეები ჩვეულ რეჟიმში სასწავლო პროცესის გაგრძელებას.
„ადგილზე ვიმყოფები როგორც კი გავიგე ხანძრის შესახებ. ხის შენობა იყო და დაიწვა.
სოფელში არის ცარიელი სახლები, გარდა ამისა გვაქვს ე.წ. “სოფლის სახლი”, სადაც ასევე შესაძლებელია სასწავლო პროცესის ჩატარება. ჩვენ გვაქვს სასკოლო ინვენტარის მარაგი. ერთი დღე გვჭირდება, რათა აღნიშნული სახლების მეპატრონეებთან ვაწარმოოთ მოლაპარაკება, მაქსიმუმ ზეგ ჩვეულ რეჟიმში განაგრძობენ სასწავლო პროცესს” -განაცხადა ედუარდ მიქელაძემ.
ავტორი: ნაირა ქობულაძე
