„კობა კობალაძის შვილი ისევე როგორც ნებისმიერი სხვა ადამიანი, კანონის წინაშე არის თანასწორი და მასთან მიმართებითაც დარწმუნებული ვარ ისეთივე მიდგომა იქნება, როგორც სხვა ადამიანების შემთხვევაში“,- ამის შესახებ ადამიანის უფლებათა კომიტეტის თავმჯდომარემ, სოფო კილაძემ განაცხადა.
მისი თქმით, უდანაშაულობის პრეზუმცია ყველა ადამიანზე ერთნაირად ვრცელდება.
„ის, რომ მისი ოჯახის წევრი, ამ შემთხვევაში შვილი, გარკვეულ თემასთან არის კავშირში, ეს არ ნიშნავს იმას, რომ გამოძიება აპრიორი არის მიკერძოებული. მესმის, რომ გარკვეული მედიასაშუალებები ამას ტირაჟირებენ და შეეცდებიან ეს თემა გამოიყენონ „ქართული ოცნების“ წინააღმდეგ, მაგრამ ჩვენ უნდა შევხედოთ ფაქტებს. დღეს რამდენადაც ვიცი, მოხდება აღკვეთის ღონისძიებასთან დაკავშირებით მსჯელობა, დანარჩენი დავაკვირდებით საქმის მსვლელობას და გაირკვევა ყველაფერი. არსებობს უდანაშაულობის პრეზუმფცია და ეს უდანაშაულობის პრეზუმფცია ასევე თანაბრად ვრცელდება ყველაზე, კობა კობალაძის შვილი იქნება თუ ნებისმიერი სხვა მოქალაქე”- განაცხადა კილაძემ.
„ქართული ოცნების“ დეპუტატის, კობა კობალაძის შვილს, დავით კობალაძეს ბრალი წაუყენეს.
საქმე ეხება თბილისში, 24 ივნისს მომხდარ ფაქტს, რომელზეც ინფორმაცია შსს-მ გაავრცელა. აღნიშნულ საქმეში კობა კობალაძის შვილი ფიგურირებს. შსს-ს ინფორმაციით, 2000 წელს დაბადებული დ.კ. პოლიციის განყოფილებაში პირადი ინიციატივით გამოცხადდა. გარდა ამისა, საქმეზე, შსს-ს ცნობით, დაკავებულია კიდევ ორი პირი.
