„ენკა რინიუებლზის“ დირექტორი მერაბ ლომინაძე პოლიციას სთხოვს, დაიცვას კომპანიის თანამშრომელთა უსაფრთხოება.
„ვთხოვ პოლიციას, დაიცვას ჩვენი თანამშრომლობის ფიზიკური უსაფრთხოება, სახალხო დამცველს კი – მათი ფსიქოლოგიური ზეწოლის ფაქტების შესწავლისკენ მოვუწოდებ. დღეს „ენკა რინიუებლზის“ თანამშრომლების წინააღმდეგ, რომლებიც წინასამშენებლო სამუშაოებს ახორციელებენ, სერიოზული ფსიქოლოგიური ზეწოლა მიმდინარეობს. ჩვენი თანამშრომლების დიდი ნაწილი ადგილობრივი მოსახლეები და იმ ადამიანთა მეზობლები არიან, რომლებიც პროექტის განხორციელებას ეწინააღმდეგებიან. მათ და მათი ოჯახის წევრებს პროექტის მოწინააღმდეგეების სახელით უკავშირდებიან და ფიზიკური განადგურებით ემუქრებიან. ჩვენ აუცილებლად გადავცემთ მსგავს ფაქტებს სამართალდამცავ ორგანოებს, ასევე მოვუწოდებთ სახალხო დამცველს, ამ საკითხითაც დაინტერესდეს,“ – განაცხადა ნორვეგიულ – თურქული კომპანიის „ენკა რინიუებლზის“ ახლადდანიშნულმა დირექტორმა მერაბ ლომინაძემ.
დღეს „ნამახვანჰესისი” წინააღმდეგ სოფელ გუმათში აქცია მიმდინარეობს , ადგილზე მობილიზებულია პოლიცია.
აქციის მონაწილეები ჰესის მშენებლობას აპროტესტებენ და აცხადებენ, რომ ისინი ხელისუფლებას ჰესის აშენების უფლებას არ მისცემენ.
ადგილზე მობილიზებულია სპეცრაზმი და ასევე, წყლის ჭავლის მანქანა.
