უმრავლესობის წევრის, გია ვოლსკის განცხადებით, მოლაპარაკების მესამე რაუნდი ოპოზიციასთან მომდევნო კვირას გაიმართება, გია ვოლსკი ამბობს, რომ რიგგარეშე არჩევნებთან დაკავშირებით დაუშვებელია, რადგან ახლა სხვა ბევრი პრობლემაა მოსაგვარებელი, რაც კოვიდს და ქვეყანაში შექმნილ მდგომარეობას ეხება.
„რაც შეეხება ოპოზიციის მხრიდან დათმობას, მე ვერ დავარქმევდი ამას დათმობას, ვინაიდან პოლიტიკურ სასაფლაოზე არავის სურს მოხვედრა. ქვეყანაში შექმნილი მძიმე მდგომარეობა, კოვიდი მაქვს მხედველობაში და ეკონომიკაზე მისი ძალიან უარყოფითი გავლენა, სწორედაც მოითხოვს აზრთა ჭიდილს, რათა ბიუჯეტი გავანაწილოთ სწორად და ამ შემთხვევაში ის პოლიტიკური ძალა, ვინც გამოაკლდება ასეთ მსჯელობას საგანგებო ღონისძიებების დაფინანსების, დაგეგმვისა და სტრატეგიის შემუშავების თაობაზე, საკმაოდ ცუდ მდგომარეობაში აღმოჩნდება, მითუმეტეს, რომ მათი მხარდამჭერი საზოგადოებაც, სწორედაც ამას მოითხოვს მათგან. ვფიქრობ, ამ ხაზით თუ იქნება კომპრომისები დაშვებული, ეს იქნება კომპრომისი, რომელიც გაითვალისწინებს საზოგადოების, როგორც დიდი ნაწილის,ასევე შედარებით მცირე ნაწილის და მთლიანად საზოგადოების ინტერესებს“, – განაცხადა ვოლსკიმ.
გია ვოლსკი იმედს იტოვებს, რომ მოლაპარაკება საბოლოოდ შედგება.
„იმედი მაქვს, რომ ექნებათ განსხვევაბული მოსაზრება, როდესაც კიდევ ერთხელ დავჯდებით მოლაპარაკების მაგიდასთან და როდესაც კიდევ ერთხელ ხაზი გაესმება, თუ რას ითხოვს არა მარტო ქართული საზოგადოება პოლიტიკური სუბიექტებისაგან, არამედ ჩვენი პარტნიორი ქვეყნები და ორგანიზაციები, ვინაიდან საქართველო საგანგებოდ მნიშვნელოვანია, როგორც ევროკავშირისთვის, ასევე აშშ-სთვის და იმ საერთაშორისო ორგანიზაციებისათვის, რომელიც ჩართულია მეტად რთული ვითარების რეგულაციის საკითხებში. მე არ ვფიქრობ, რომ პოლიტიკური სუბიექტები მხოლოდ თავისი სახელით უნდა გამოდიოდნენ და საკუთარი ინტერესებით ხელმძღვანელობდნენ, სწორედ ეს მაძლევს იმედს, რომ მოლაპარაკება საბოლოოდ შედგება და პარლამენტში გადავიტანთ ჩვენი დაპირისპირების თუ საქმიანი ურთიერთობის პერიპეტიებს“, – განაცხადა ვოლსკიმ.
