სასესიო სხდომის დროს, დარბაზში შემოსვლის უფლება არ აქვს დეპუტატების გარდა არავის,- ამის შესახებ, პარლამენტის თავმჯდომარემ, კახაბერ კუჭავამ, ბიუროს სხდომაზე “ლელო საქართველოსთვის” ლიდერის, ბადრი ჯაფარიძის საპასუხოდ განაცხადა.
კუჭავას თქმით, სასესიო დარბაზში არეულობის გამო ბოლო ორი რიგგარეშე სხდომიდან ერთი ჩაიშალა.
“სასესიო სხდომის დროს, დარბაზში შემოსვლის უფლება არ აქვს დეპუტატების გარდა არავის, ჟურნალისტებიც არიან შესაბამის ადგილას გამწესებულნი. გვქონდა შემთხვევა, როდესაც შემოსულები შეეცადნენ დარბაზის ბლოკირებას და შემოიჭრნენ კიდეც დარბაზში, ეს ხომ რეალობაა.
თქვენ გაახსოვთ ბოლო ორი რიგგარეშე სხდომა, როგორ წარიმართა. ერთ-ერთი, სამწუხაროდ, ჩაიშალა კიდეც. წესრიგი ახსნეთ -ზუსტადაც წესრიგი არის მთავარი, რაც უნდა უზრუნველვყო მე და სამწუხაროდ, ეს არც დღეს ხდება, არც გუშინ ხდებოდა, ეს ხდება წლების განმავლობაში, როდესაც მოქმედებს შესაბამისი უსაფრთხოების წესრიგი, რომ პარლამენტის მუშაობას არ შეექმნას საფრთხე უზრუნველვყოფ ამას, რომ წინასწარ მოგეწოდოთ თქვენც, ფრაქციებს, ყველას ინფორმაცია, რომ იმოქმედებს უსაფრთხოების საგანგებო რეჟიმი”,- განაცხადა პარლამენტის თავმჯდომარემ.
ცნობისთვის, დღეს დღეს საკანონმდებლო ორგანოში არასამთავრობო ორგანიზაციის წევრები არ შეუშვეს.
ახალგაზრდა იურისტთა ასოციაციის თავმჯდომარის, ნიკა სვიმონიშვილის განცხადებით, პარლამენტში გადაწყვეტილებას უსაფრთხოების ზომების გამკაცრებით ახსნეს.
“პარლამენტში არ შეგვიშვეს არასამთავრობო სექტორის წარმომადგენლები. განცხადების გაკეთება გვინდოდა ქალ დეპუტატთა მიმართ ძალადობის დასაგმობად, თუმცა უსაფრთხოების ზომების გამო, არ შეგვიშვეს, საფრთხე ვყოფილვართ თურმე. აღარ ვიცი რა ვთქვა, ძალიან დიდი სირცხვილია.”,- წერს ნიკა სვიმონიშვილი სოციალურ ქსელში.
ფაქტს გამოეხმაურა პარტია “ლელოს” ლიდერი ბადრი ჯაფარიძე.
მისი თქმით, არ შეიძლება ადამიანის შეზღუდვა სრულიად უსაფუძვლოდ.
“სხვაგვარად აზრი არ აქვს საშვების სისტემას, ან ადამიანების მოწვევას, თუ უცებ ვიღაც გადაწყვეტს, რომ აღარ უნდა შემოუშვას პარლამენტში”,- განაცხადა ბადრი ჯაფარიძემ.
