დღეს ბათუმის საკონსტიტუციო სასამართლოში „ლეიბორისტულმა პარტიამ“ და არასამთავრობო ორგანიზაცია „მოძრაობა სოლიდარობამ“ კომენდანტის საათის გაუქმებისა და სახელმწიფოს მიერ თვითდასაქმებულებზე და დასაქმებულებზე კომპენსაციის თანხის გათანაბრების მოთხოვნით სარჩელი შეიტანეს. როგორც ისინი აცხადებენ, კომენდანტის საათის არსებობა არაკონსტიტუციურია და მას მხოლოდ პოლიტიკური დატვირთვა აქვს.
ხოლო თვითდასაქმებულსა და დასაქმებულებზე კომპენსაციის გაცემა, ერთ შემთხვევაში 1200 ლარი და მეორე შემთხვევაში 300 ლარი, არის დისკრიმინაციული მიდგომა, რადგან კანონის წინაშე ყველა ადამიანი თანასწორია.
„საქართველო არის რეკორდსმენი ქვეყანა კომენდანტის საათის ხანგრძლივობის მიხედვით და ის აშკარად უკვე დიდი ხანია პოლიტიკურია და არა ეპიდემიის საწინააღმდეგო.
აქედან გამომდინარე, კატეგორიულად მოვითხოვთ საკონსტიტუციო სასამართლო ამ ნაწილში მაინც იყოს კონსტიტუციის დამცველი და არა ხელისუფლების, გააუქმოს კომენდანტის საათი. ამასთან ერთად ასევე მოვითხოვთ თუნდაც სიმბოლური დაბალი 200 ლარიანი კომპენსაცია, რომელიც დასაქმებულებზე გაიცემა, იქნეს გაცემული თვითდასაქმებულებზეც. მნიშვნელობა არ აქვს, ადამიანი დასაქმებულია თუ თვითდასაქმებული, საარსები მინიმუმი ჭირდება და ისედაც საარსებო მინიმუმთან მიახლოებული და არა საკმარისი, მაგრამ მაინც 200 ლარი, უნდა იყოს გაცემული ყველაზე თანაბრად“, – განაცხადა ლაშა ჩხარტიშვილმა.
ავტორი: ნაირა ქობულაძე
