„ლელო“ გუბერნატორების ინსტიტუტის გაუქმებას ითხოვს, ამის შესახებ „ლელოს“ ერთ-ერთი ლიდერი თაზო დათუნაშვილი აცხადებს.
„გვინდა გამოვეხმაუროთ კვლევას, რომლის ავტორი იყო „საერთაშორისო გამჭვირვალობა-საქართველო“. კვლევა ეხებოდა სახელმწიფო რწმუნებულების ინსტიტუტს და სახელმწიფო რწმუნებულების გაწეულ ხარჯებს 2020 წლის განმავლობაში.
2020 წლის მანძილზე, ჩვენი გადასახადებიდან 5 მლნ 500 ათასი ლარი დახარჯული იქნა სრულიად უშინაარსო და უფუნქციო ინსტიტუტის, სახელმწიფო ინსტიტუტის ხელფასების, პრემიების, მივლინებების და საწვავის ხარჯებზე.
უკანასკნელი წლების მანძილზე ჩატარებული აბსოლუტურად ყველა კვლევა და დასკვნა, რომელიც ეხება თვითმმართველობას და დეცენტრალიზაციას ამ ქვეყანაში, ამბობს, რომ მთავარი გამოწვევა და საფრთხე დეცენტრალიზაციისთვის არის რწმუნებულების ინსტიტუტი“, – აცხადებს დათუნაშვილი.
იცით, ჩვენს პარტნიორებთან ერთად, როგორც პოლიტიკურ სპექტრთან, ისე არასამთავრობო ორგანიზაციებთან ერთად, დავიწყეთ პროექტი „კონსტიტუცია 100“, რომელიც თავისი არსით მოიაზრებს დიდ რეფორმას დეცენტრალიზაციის თვალსაზრისით.
„ლელო“ თვლის, რომ დეცენტრალიზაციისკენ კიდევ ერთი გადადგმული ნაბიჯი იქნება სახელმწიფო რწმუნებულის ინსტიტუტი რომ გავაუქმოთ, როგორც ზედმეტი რგოლი თვითმმართველობის ადმინისტრაციაში“, – აცხადებს დათუნაშვილი.
