„პატრიოტთა ალიანსის“ ლიდერები – ირმა ინაშვილი და დავით თარხან-მოურავი ოკუპირებული აფხაზეთის ტერიტორიაზე იმყოფებოდნენ.
ინფორმაცია ამის შესახებ „ლელოს“ მაჟორიტარმა კანდიდატმა ზუგდიდში, ალექსანდრე ახვლედიანმა გაავრცელა.
მისი ინფორმაციით, დავით თარხან- მოურავი და ირმა ინაშვილი 2 დღის წინ ენგურის ხიდის გავლით აფხაზეთის ტერიტორიაზე გადავიდნენ და იქ დაახლოებით 4 საათის განმავლობაში იმყოფებოდნენ. ტერიტორია მათ ღამის 12 საათისკენ დატოვეს. მათ უპრობლემოდ გაიარეს ბლოკ საგუშაგოები, რომელსაც ქართველი სამართალდამცველები აკონტროლებენ, მათ შორის საგუშაგო, სადაც სპეცდანიშნულების რაზმი დგას.
„18 აგვისტოს დღის მეორე ნახევარში პოლიტიკური პარტია „პატერიოტთა ალიანსი“-ს ლიდერებმა ირმა ინაშვილმა და თარხან-მოურავმა საქართველოს ხელისუფლებისა და მისი შესაბამისი სამსახურების მეშვეობით, მალულად გადალახეს აფხაზეთთან გამყოფი ზოლი და სოფ. ჭუბურხინჯში რუსეთისა და დე-ფაქტო აფხაზეთის ხელისუფლების წარმომადგენლებს შეხვდნენ. ასეთი დაბალი რეიტინგის პოლიტიკური სუბიექტი ასეთი მხარდაჭერით რატომ სარგებლობს ხელისუფლების? ან ვინ მისცა ასე უკანონოდ საოკუპაციო რეჟიმის და არ აღიარების პოლიტიკის სრული იგნორირების უფლება? სახეზეა პარალიზებული და კოლაბორაციონალისტური ხელისუფლებისა და მისი სატელიტი ,,ოპოზიციური” პარტიის ქართველი ხალხის ზურგს უკან უპასუხისმგებლო და მოღალატეობრივ ქმედება. მიზანი მათი პატიზანული ვიზიტის ადვილად გასაგებია!!!,-აცხადებს ახვლედიანი.
ენგურის ხიდთან, რომელიც უკვე რამდენიმე თვეა ჩაკეტილია, თარხან- მოურავი და ირმა ინაშვილი სპეციალურმა მანქანამ მიაცილა. ორივე მათგანი ოკუპირებულ რეგიონში მცხოვრებმა ერთ-ერთმა მოქალაქემ დაინახა.
„პატრიოტთა ალიანსის“ ლიდერების ოკუპირებულ რეგიონში ყოფნას ადასტურებენ სასწრაფო სამედიცინო დახმარების ექიმები, რომლებმაც ენგურის ხიდიდან ორივე პოლიტიკოსი, განმუხურში, საკარანტინე ზონაში გადაიყვანეს.
გავრცელებული ინფორმაციით, “პარტიოტთა ალიანსის” ლიდერებმა განმუხური უკვე დატოვეს და თვითიზოლაციაში გადავიდნენ.
“პრაიმტაიმის” ინფორმაციით, ვიზიტთან დაკავშირებით ირმა ინაშვილი კომენტარის გაკეთებას აპირებს. იგი ამ დროისთვის ბათუმში იმყოფება.
