ფრაქცია „დამოუკიდებელი დეპუტატების“ წევრი ლევან კობერიძე „საზოგადოებრივი ჯანმრთელობის შესახებ“ კანონპროექტს საკონსტიტუციო სასამართლოში გასაჩივრებას გეგმავს. ამის შესახებ მან ჟურნალისტებთან საუბრისას განაცხადა.
როგორც კობერიძე ამბობს, კანონპროექტი არაკონსტიტუციურია და მთავრობას შეზღუდვების დაწესების საშუალებას აძლევს.
„ეს ყველაფერი იყო პარლამენტის პრეროგატივა. ახლა აპირებენ, ამ კანონის ვადის წლის ბოლომდე გაგრძელებას. კონკრეტულ შედეგებს უნდა ვიღებდეთ, თუ რა ეპიდემიოლოგიურ პროგნოზზე ვსაუბრობთ, რამდენად მზად არის ჰოსპიტალური სექტორი და ა.შ. წინააღმდეგ შემთხვევაში, თუ ყველაფერი კარგად არის, მეორე ტალღით რატომ გვაშინებენ. თუ მეორე ტალღა ასეთი საშიშია, მაშინ ყველაფერი რატომ იხსნება ეკონომიკის მიმართულებით?! დღეს, სამწუხაროდ, პარლამენტი თავის უფლებამოსილებას დათმობს და მთავრობას გადასცემს. კენჭისყრის შედეგებს დაველოდები და ალბათ, „ქართული ოცნება“ მხარს დაუჭერს თავისივე ინიცირებულ კანონპროექტს. თუ ასე მოხდა, აუცილებლად დავიწყებთ საკონსტიტუციო სასამართლოში გასაჩივრების პროცესს“, – განაცხადა კობერიძემ.
დღეს პარლამენტი „საზოგადოებრივი ჯანმრთელობის შესახებ“ კანონს კენჭს უყრის.
ცნობისთვის, „საზოგადოებრივი ჯანმრთელობის შესახებ“ კანონის მოქმედების ვადა შესაძლოა, 2020 წლის 15 ივლისიდან 2021 წლის პირველ იანვრამდე გაგრძელდეს.
პარლამენტმა აღნიშნული კანონი კორონავირუსის წინააღმდეგ ბრძოლის მიზნით მიიღო და კონკრეტული ღონისძიებები განსაზღვრა, რომელთა მოქმედების ვადად 2020 წლის 15 ივლისი განისაზღვრა.
შეგახსენებთ, საზოგადოებრივი ჯანმრთელობის შესახებ“ კანონში ცვლილებები საქართველოს პარლამენტმა მაისში დაამტკიცა, რომლითაც მთავრობას 15 ივლისამდე შემზღუდავი ღონისძიებების გატარება საგანგებო მდგომარეობის გარეშეც შეეძლება.
