„მადლობის გადახდით, ვინც განაპირობა ის, რომ დღეს ამ ქვეყანას ჰყავს საერთაშორისო სისხლის სამართლის სასამართლოში მოსამართლე“,- ამის შესახებ იუსტიციის მინისტრის მოვალეობის შემსრულებელმა, გოჩა ლორთქიფანძემ, პარლამენტში უწყების საქმინაობის ანგარიშის წარდგენამდე განაცხადა.
გოჩა ლორთქიფანიძემ პირველ რიგში მადლობა გადაუხადა თეა წულუკიანს და აღნიშნა, რომ სწორედ თეა წულუკიანია ამ ე.წ. პროექტის ავტორი და სულისჩამდგმელი.
„პირველ რიგში, ეს არის ქალბატონი თეა წულუკიანი, რომელიც, თუ შეიძლება პროექტი ეწოდოს იმას, რომ ამ ქვეყანას ამ სასამართლოში ჰყოლოდა მოსამართლე, ამ პროექტის იდეის ავტორი, სულისჩამდგმელია. ეს იყო ადამიანი, რომელმაც ყველაზე დიდი მხარდაჭერა გამიწია და შემაგულიანა შემდეგ, რომ მიმეღო მონაწილეობა კონკურსში და ბოლომდე დარჩა ამის მხარდამჭერად.
ამ ყველაფერს წინ უძღოდა ის, რომ იუსტიციაში იყო გუნდი, რომელმაც შეიმუშავა საარჩევნო პროცესის ძალიან კომპლექსური სტრატეგია, ასევე სამოქმედო გეგმა და განახორციელა ეს გეგმა. ამიტომ ჩემი თანაგუნდელობისთვის არ შემიძლია, მადლობა არ გადავუხადო ახალგაზრდა კოლეგას, იუსტიციის სამინისტროს საერთაშორისო სასამართლოებში წარმომადგენლობის დეპარტამენტის უფროსს ბექა ძამაშვილს. რა თქმა უნდა, ეს პროცესი ვერ იქნებოდა და მადლობას გადავუხდი ქალბატონ პრეზიდენტს, ბატონ პრემიერ-მინისტრს მხარდაჭერისთვის, რაც მათ გამოიჩინეს, ასევე, ფასდაუდებელია საგარეო საქმეთა სამინისტროს წვლილი, მინისტრის, ბატონი დავით ზალკალიანის, აგრეთვე, ჩვენი მუდმივი წარმომადგენლობის ნიუ-იორკში, ჰააგაში დროებით საქმეთა რწმუნებულის, ბრაზილიაში ელჩის, ჟენევაში გაერო-სა და საერთაშორისო ორგანიზაციებთან ჩვენი წარმომადგენლის, ასევე, არ მინდა, სხვა მრავალი ელჩის სახელი და გვარი გამომრჩეს.
მინდა, ყველა მათგანს ამ ტრიბუნიდან მადლობა გადავუხადო და კვლავაც განვაცხადო, რომ მათი ძალისხმევის, მხარდაჭერის, როგორც ამ ქვეყნის მხარდაჭერის, ქართული საზოგადოების მხარდაჭერის გარეშე ეს ვერ მოხდებოდა“, – განაცხადა გოჩა ლორთქიფანიძემ.
გოჩა ლორთქიფანიძე სისხლის სამართლის საერთაშორისო სასამართლოს მოსამართლედ აირჩიეს. ამავე დროს, იგი იუსტიციის მინისტრობის კანდიდატად არის წარდგენილი.
