სახელმწიფო მდივნის მოადგილის დარჩენა გათვალისწინებული იყო, – ამის შესახებ საქართველოს საგრეო საქმეთა მინისტრმა, დავით ზალკალიანმა “დღის კურიერის” ეთერში განაცხადა.
ზალკალიანის თქმით, სახელმწიფო მდივნის მოედგილე აშშ-ში ხვალ დილით გაემგზავრება.
“ის ფაქტი, რომ სახელმწიფო მდივნის მოადგილე ხვდება ოპოზიციის წარმომადგენლებს, ეს არის კარგი და უნდა აღინიშნოს, რომ სახელმწიფო მდივნის მოადგილის დარჩენა, მანამდეც იყო გათვალისწინებული, ჩვენ მანამდეც ვიცოდით, რომ ის ჩამოვიდოდა სახელმწიფო მდივანთან ერთად და შემდგომ დარჩებოდა და ხვალ გამთენიისას გაემგზავრება უკან. ეს ჩვენთვის წინასწარ იყო ცნობილი. დეტალები ყოველთვის მნიშვნელოვანია, მაგრამ მე მხოლოდ და მხოლოდ მივესალმები იმ ფაქტს, რომ ოპოზიციას ექნება შესაძლებლობა ჩვენს სტრატეგიულ პარტნიორთან, აშშ-ის სახელმწიფო მდივნის წარმომადგენელთან შეხვედრა იქნება კარგი შესაძლებლობა, მათ თავად მოისმინონ ჩვენი მთავარი სტრატეგიული პარტნიორის პოზიცია. ასევე ეჭვი არ მეპარება, რომ ისინი თავიანთ სათქმელსაც, რომელსაც ჩვენთან საჯაროდ აცხადებენ, ამ შეხვედრაზე გააჟღერებენ,” – განაცხადა დავით ზალკალიანმა.
შეგახსენებთ, 17-18 ნოემბერს აშშ-ის სახელმწიფო მდივანი, მაიკ პომპეო საქართველოს ეწვია. ვიზიტის ფარგლებში სახელმწიფო მდივანი საქართველოს პრეზიდენტს – სალომე ზურაბიშვილს, საგარეო საქმეთა მინისტრს – დავით ზალკალიანს, პრემიერ-მინისტრს – გიორგი გახარიას, საქართველოს კათოლიკოს-პატრიარქს – ილია II-სა და არასამთავრობო ორგანიზაციების წარმომადგენლებს შეხვდა.
სახელმწიფო მდივნის მოადგილე, ფილიპ რიკერი ოპოზიციის წარმომადგენლებს შეხვდება.
