„ნაცმოძრაობის“ ტელევიზიების გეგმა არის, რომ თუ მოქალაქეებს ხელისუფლებაზე, პოლიციასა და ჯარზე ვერ გააბრაზებენ, მინიმუმ, სტრესულ მდგომარეობაში მაინც ჩააგდონ, რომ განწყობა იყოს ძალიან ცუდი.
ეს მათი ერთ-ერთი ბინძური მიზანია, – ამის შესახებ პარლამენტის თავმჯდომარის მოადგილემ და საპარლამენტო უმრავლესობის ლიდერმა, მამუკა მდინარაძემ „იმედის“ ეთერში, გადაცემაში „არენა“ განაცხადა.
„თუ ვინმე იმას იჯერებს, რასაც ისინი ტელევიზიით ლაპარაკობენ, ესაა სერიოზული პრობლემა. მე ასეთი წარმოდგენა არ მაქვს ხალხზე. მათ აქვთ იმედი, რომ იქნებ დადიოდნენ ამ ქვეყანაში ისეთი ადამიანები, რომლებიც ამას დაიჯერებენ, აღშფოთდებიან ხელისუფლებით და ეს შეცვლის საზოგადოებაში განწყობას. ამიტომაც მიდიან ვა-ბანკზე. ბუნებრივია, ეს ფსიქოლოგიური ამბავია; ადამიანი ყოველ დღე ასეთ უბედურებას რომ უყურებს, ცხადია, მისი გუნება-განწყობა ცუდისკენ შეიცვლება.
შეიძლება, ესეც მათი მიზანი იყოს, მაგრამ მათი მთავარი მიზანი მაინც დაბრალებაა. სამწუხაროდ, სწორედ დაბრალების გზით ცდილობენ საზოგადოების განწყობის შეცვლას. ჩვენი ვალდებულებაა, საზოგადოება საქმის კურსში ჩავაყენოთ დეტალების შესახებ.
ამ კონკრეტულ შემთხვევებში, ამ ტრაგედიებთან დაკავშირებით, კომუნიკაცია იმის შესახებ, თუ რას აკეთებს შინაგან საქმეთა სამინისტრო არის აუცილებელი. ასევე, მედია, რომელიც ობიექტურად ფიქრობს, უნდა მოყვეს ამის შესახებ.
ჩვენ, ყველამ ერთად, ამ ქვეყანაში მცხოვრებმა ნებისმიერმა ობიექტურად მოაზროვნე ადამიანმა, იქნება ეს ექსპერტი, პოლიტიკოსი, ჟურნალისტი თუ ჩვეულებრივი მოქალაქე, უნდა უზრუნველვყოთ, რომ სირცხვილი იყოს დაბრალება, ვისაც არ უნდა ეხებოდეს ეს; ოპოზიციონერს, ხელისუფლების წარმომადგენელს, პოლიციელს თუ მეორე მხარეს, სირცხვილი უნდა გახდეს ის, რომ ადამიანმა ტრაგედიით მანიპულირება, სპეკულირება და სარგებლობა იკადროს. ეს სირცხვილი უნდა გახდეს.
დღეს გვაქვს ასეთი მოცემულობა – აქეთ აბულინგებენ ადამიანებს, რომლებიც გაბედავს, შეეწინააღმდეგება და ამხელს მათ ამ სპეკულირებაში. „ნაცმოძრაობის“ მთელი პროპაგანდისტული მანქანა, თავისი დარჩენილი რესურსით, მიმართულია იმისკენ, რომ შეურაცხყოფის დონეზე დააბულინგონ ადამიანები, ვინც მათ აზრს არ იზიარებს“ – განაცხადა მამუკა მდინარაძემ.
