გარდაცვლილი ექთნის, მეგი ბაქრაძის ადვოკატი ამბობს, რომ მეგი ბაქრაძის საქმის გამოძიება ახალ ეტაპზე გადადის.
ადვოკატებმა უკვე მიმართეს კომპანია „ასტრაზენეკას“, რომ შეისწავლონ საქმე.
იმ შემთხვევაში თუ მიმართვაზე არ იყო რეაგირება, ადვოკატები დიდ ბრიტანეთში სპეციალურ წარმომადგენელს გაგზავნიან.
„მნიშვნელოვანი ინფორმაცია, რომელიც ჩვენ დღეის მდგომარეობით ექსკლუზიურად გაგვაჩნია, არის ის, რომ ჩვენ გვყავს 4 პირი, ვინც იცოდა მეგი ბაქრაძის მდგომარეობა ვაქცინაციამდე და იცის რა დახმარება გაეწია ვაქცინაციის შემდგომ და ისინი მიიჩნევენ ამას საგანგაშოდ“,- აცხადებს ადვოკატი ნინო ამაღლობელი.
შეგახსენებთ, რომ ახალციხის კლინიკაში 27 წლის ექთანს „ასტრაზენეკას“ ვაქცინის გაკეთების შემდეგ სავარაუდოდ, გვერდითი რეაქცია – ანაფილაქსიური შოკი განუვითარდა. ექთანი, თბილისში, პირველ საუნივერსიტეტო კლინიკაში მკურნალობდა.
ჯანდაცვის სამინისტროს ინფორმაციით, ფაქტის შესწავლა დაიწყო რეგულირების სააგენტომ, რათა დადგინდეს მიზეზ-შედეგობრივი კავშირი ახალგაზრდა ქალის მძიმე მდგომარეობასა და ვაქცინას შორის.
საქართველოში „ასტრაზენეკას“ ვაქცინა 13 მარტს შემოვიდა, ხოლო 15-ში ვაქცინაციის პროცესი დაიწყო. იმუნიზაცია ქვეყანაში ნელი ტემპებით მიმდინარეობს.
