თბილისის საქალაქო სასამართლოში ივერი მელაშვილისა და ნატალია ილიჩოვას წინასასამართლო სხდომა რამდენიმე წუთში დაიწყება.
როგორც ივერი მელაშვილის ცოლმა, თამარ სულაძემ სხდომის დაწყებამდე ჟურნალისტებთან საუბრისას განაცხადა, აქვს მოლოდინი, რომ დღეს გაათავისუფლებენ.
„სასამართლოსგან ველოდები იმას, რომ ამ უდანაშაულო ხალხს გაათავისუფლებენ, ყოველ შემთხვევაში წინასწარი დაკავების იზოლატორიდან მაინც. საბოლოოდ, რომ გამართლდებიან ამაში ეჭვი არ მეპარება. დანაშაული შეთითხნილია. მგონია, რომ გაათავისუფლებენ. გირაოზე თანახმა ვართ, ბინას ჩავდებ და იმით გამოვიყვან,“ – აცხადებს თამარ სულაძე.
ცნობისთვის, საქართველოს გენერალურმა პროკურატურამ სახელმწიფო უსაფრთხოების სამსახურთან ერთობლივი თანამშრომლობით დააკავა საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი – ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.
პროკურატურის ინფორმაციით, ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში.
