„რესპუბლიკური პარტიის“ ერთ-ერთი ლიდერი დავით ბერძენიშვილი თვლის, რომ საქართველოს ყოფილი პრეზიდენტის, მიხეილ სააკაშვილის პრემიერობის კანდიდატად დასახელება ყველა პარტიას, მათ შორის, „ქართულ ოცნებასაც“ აწყობდა.
როგორც მან „პრაიმტაიმნიუსთან“ საუბრისას განაცხადა, ამ პროცესში ყველა პარტია საკუთარ დივიდენდს ხედავს.
„მე მესმის, რატომ დაასახელა „ნაციონალურმა მოძრაობამ“ და „ძალა ერთობაშიამ“ პრემიერობის კანდიდატად მიხეილ სააკაშვილი. სინამდვილეში, ყველა დივიდენდს ხედავს „ნაცმოძრაობის“ ამ გადაწყვეტილებაში. არ ლაპარაკობენ, მაგრამ საყოველთაო კონსენსუსი იყო, რომ სააკაშვილი ყოფილიყო პრემიერ-მინისტრობის კანდიდატი.
სააკაშვილის კანდიდატად დასახელება არის საარჩევნო კამპანიაში აქტიურად მონაწილეობის ფორმა და არჩევნების მერე გამოჩნდება ამ პროცესის სხვა ასპექტები.
როგორც ჩანს, სააკაშვილმა, „ნაციონალურმა მოძრაობამ“ და „ძალა ერთობაშიამ“ ჩათვალეს, რომ ხუთი ნომრისთვის მობილიზებას წაადგებოდა სააკაშვილის პრემიერ-მინისტრობის კანდიდატად წარდგენა. პრემიერად სააკაშვილის წარდგენა სამართლებრივ პრობლემასთან არ არის დაკავშირებული. სამართლებრივი საკითხი დღის წესრიგში მაშინ დადგება, თუ მისი პრემიერობა რეალური იქნება.
თქვენს მკითხველს გავახსენებ, 2012 წელს როცა ბიძინა ივანიშვილის ხელმძღვანელობით, არჩევნები „ქართულმა ოცნებამ“ მოიგო, 16 ოქტომბერს სააკაშვილმა დაუბრუნა მას საქართველოს მოქალაქეობა და ოქტომბრის ბოლოს ბიძინა ივანიშვილი გახდა საქართველოს პრემიერი“,- განაცხადა ბერძენიშვილმა.
ინფორმაციისთვის, გუშინ ცნობილი გახდა, რომ „ნაციონალურმა მოძრაობამ“ პრემიერობის კანდიდატად საქართველოს ყოფილი პრეზიდენტი მიხეილ სააკაშვილი შეარჩია.
