“მინდა საქართველოში გათენდეს, ეს მთავრობა წავიდეს და მოვიდეს მხოლოდ კოალიციური მთავრობა, ეს არის ჩვენი ხსნა, ამიტომ არის, რომ 72 წლის კაცი იძულებული გავხვდი წინა ფრონტზე გამოვსულიყავი, როგორც არასდროს ისეთი შემართებით ვარ, ეს არ არის მხოლოდ ადგილობრივი თვითმმართველობის არჩევნები, ეს არის რეფერენდუმი და წყდება საქართველოს მომავალი”,- ამის შესახებ „ნაციონალური მოძრაობის“ ზუგდიდის მერობის კანდიდატმა ანზორ მელიამ ზუგდიდის პირველ საარჩევნო უბანში ხმის მიცემის შემდეგ განაცხადა.
„გვინდა სიღარიბეში, სიბინძურეში ცხოვრება, თუ გვინდა სიყვარული, ურთიერთპატივისცემა, სამუშაო ადგილები და მატერიალური მდგომარეობის გაუმჯობესება? მაშინ ხმა უნდა მივცეთ ოპოზიციურ ძალებს. მინდა საქართველოში გათენდეს, ეს მთავრობა წავიდეს და მოვიდეს მხოლოდ კოალიციური მთავრობა, ეს არის ჩვენი ხსნა, ამიტომ არის, რომ 72 წლის კაცი იძულებული გავხვდი წინა ფრონტზე გამოვსულიყავი. ახლა ხმის არ ამოღება დანაშაულია, ყველამ უნდა ამოვიღოთ ხმა, რომ საქართველო გადავარჩინოთ”, – აღნიშნა ანზორ მელიამ.
დღეს, 2 ოქტომბერს საქართველოში ადგილობრივი თვითმართველობის არჩევნებია. ამომრჩევლები ქვეყნის მასშტაბით 64 მერს და ასევე, 64 საკრებულოს 2 068 წევრს აირჩევენ, როგორც პროპორციული, ისე მაჟორიტარული წესით.
მერის არჩევნებში გამარჯვებულად გამოცხადდება კანდიდატი, რომელიც არჩევნებში ამომრჩეველთა ხმების 50%-ზე მეტს მიიღებს. თუ კონკრეტულ მუნიციპალიტეტში ვერცერთმა კანდიდატმა ეს ნიშნული ვერ გადალახა, არჩევნების მეორე ტური დაინიშნება.
