ინფექციური საავადმყოფოს დირექტორი მოსახლეობას რეკომენდაციების დაცვისკენ კიდევ ერთხელ მოუწოდებს.
თენგიზ ცერცვაძეს მაგალითად კაფე „ფაბრიკაში“ არსებული მდგომარეობა მოჰყავს და ამბობს, რომ საზოგადოებამ ზედმეტად ჩქარა დამშვიდდა.
„რაღაც ძალიან ჩქარა დამშვიდდა ჩვენი სზოგადოება და ძალიან სწრაფად გადაერთო შეზღუდვებიდან სრულ თავისუფლებაზე. ბევრი მაგალითი იყო, როცა ხალხმრავალი შეკრებები განახლდა. სურათი დაიდო Facebook-ზე, კაფე „ფაბრიკაში“ ელემენტარულად არ იყო დაცული არანაირი სოციალური დისტანცია, პირბადეები, არაფერი. სულ ამის ფიქრი მქონდა და ამაზე ვაფრთხილებდი საზოგადოებას, რომ არ შეიძლება რომ შევირგოთ ის, რასაც მივაღწიეთ ამ პირველი ტალღის დროს? მოდით, შევირგოთ და მეორე უკიდურესობაში ნუ გადავვარდებით. შეზღუდვების რაღაც ნაწილი თვითშეგნების ხარჯზე შევინარჩუნოთ და ზედმეტად ნუ ავიწყვეტთ. თუ აქამდე ვერიდებოდით ხალხმრავალ შეკრებებს, ახლა ყოველდღე ნუ გავმართავთ ასეთ შეკრებებს. უცებ ნუ მივატოვებთ ნიღბის ტარებას, იგივე სოციალურ დისტანცირებას და სხვა“, – განაცხადა ცერცვაძემ „პირველი არხის“ ეთერში.
ამ დროის მონაცემებით, საქართველოში კორონავირუსით ინფიცირების 827 შემთხვევაა დადასტურებული. მათ შორის 13 პაციენტი გარდაიცვალა, 690 ადამიანი კი გამოჯანმრთელდა.
