ბუკნარის, მუხაესტატეს და ხუცუბნის მცხოვრებლები სასმელ წყალთან დაკავშირებული პრობლემის მოგვარებას ითხოვენ.
ისინი ქობულეთის მერიასთან შეიკრიბნენ. აქციის მონაწილეების განცხადებით წყალი გრაფიკით მიეწოდებათ, თუმცა არის ისეთი დღეებიც, როდესაც წყალი საერთოდ არ აქვთ. ადგილობრივები პერმანენტულ აქციებს აანონსებენ.
ქობულეთის მერიაში კი აცხადებენ,რომ პრობლემის შესახებ იციან და მის გადაჭრას ცდილობენ.
„სოფელ ბუკნარში ზაფხულის პერიოდში დებეტთან დაკავშირებით არის პრობლემები, თუმცა მაქსიმალურად ვცდილობთ, რომ მოსახლეობას წყალი მივაწოდოთ. ამ ეტაპზე მათ წყალი მიეწოდება, 300 ტონიან აუზზე 220 ოჯახია დაერთებული, დღის განმავლობაში 700 ტონამდე წყალი მიეწოდებათ, დღეში ორჯერ ივსება აუზი. მოსახლეობას ბოსტნებში აქვთ წყალი გაშვებული და ყაირათიანად არ ხმარობენ. სოფელ მუხაესტატეს შემთხვევაში წყლის სისტემის პროექტი გავამზადეთ და მოსახლეობას გავაცანით, უახლოეს პერიოდში ტენდერი გამოცხადდება. აჭარის წყლის ალიანსის წყლისა და წყალარანირების სისტემას აწესრიგებს, ეს ნიშნავს რომ სოფელში თითოეულ დასახლებას თანამედროვე წყლის მოწოდება ექნებათ. სოფელ ოჩხამურში, საპროექტო სამუშაოები მიმდინარეობს, ასევე მზად არის მუხაესტატეს მეურნეობისთვის მზად არის პროექტი. სოფელ ოჩხამურყან დაკავშირებით კვლევები მიმდინარეობს, თუ სად შეიძლება ჭაბურღილების განთავსება. პირველ ეტაპზე მუხაესტატეს მეურნეობაში დაიწყება სამუშაოები, შემდეგ სოფელ ოჩხამურში, და ეტაპობრივად სხვა სოფლებში, რადგან ეს არის მასშტაბური პროექტი“, – განაცხადა ქობულეთის ვიცე-მერმა ლევან ზოიძემ.
ავტორი: ნაირა ქობულაძე
