მეთიუ ბრაიზა, ჩვენი ქვეყნის მეგობარია და მის აზრს ვითვალისწინებთ, მაგრამ მოლაპარაკებების პროცესი უკვე მიმდინარეობს, – ამის შესახებ „სტრატეგია აღმაშენებლის“ წევრმა, სერგო ჩიხლაძემ განაცხადა.
„მეთიუ ბრაიზას ეს განცხადება კონფერენციაზე გაკეთდა, სადაც ბევრი სხვა ჩვენი მეგობარი იყო. სხვადასხვა განცხადება გაკეთდა. მეთიუ ბრაიზა, რა თქმა უნდა, ჩვენი ქვეყნის მეგობარია და მის აზრს ვითვალისწინებთ, მაგრამ მოლაპარაკებების პროცესი უკვე მიმდინარეობს, დღის წესრიგი შედგენილია. დღის წესრიგი ასეთია – გვაქვს მოლაპარაკებები, ვთანხმდებით საკითხებზე და თუ შეთანხმება არის, რა თქმა უნდა, ოპოზიცია სრულფასოვნად მიიღებს მონაწილეობას პოლიტიკურ ცხოვრებაში. მეთიუ ბრაიზას კიდევ ერთხელ დიდი პატივისცემა, თუმცა მოლაპარაკებებისა და შეთანხმების გარეშე არავინ არსად შესვლას აპირებს“, – განაცხადა სერგო ჩიხლაძემ.
შეგახსენებთ, აშშ-ის სახელმწიფო მდივნის ყოფილმა თანაშემწემ, მეთიუ ბრაიზამ ოპოზიციას მიმართა და განაცხადა, „აიღეთ თქვენი მანდატები, წარმოადგინეთ ხალხი, რომელმაც ხმა მოგცათ, რადგან თქვენი უახლოესი მეგობრები ტრანსატლანტიკურ ოჯახში არ ამბობენ, რომ არჩევნები მოიპარეს“.
