ჭყონდიდის ეპარქიაში გუშინ განვითარებულ მოვლენებს მარტვილის წმ. ნინოს სახელობის მონაზონი სუსანა გამოეხმაურა.

მისი თქმით, ეკლესიებში არსებობს პრობლემები და ის აუცილებლად უნდა მოგვარდეს სასწრაფოდ:

„ეს არის ადგილი, სადაც უნდა განიხილებოდეს და განიხილებოდეს ეკლესიის პრობლემები. სამწუხაროდ, დღეს ისჯება ის სასულიერო პირები, ვინც ითხოვს ამ გაფართოებულ საეკლესიო კრებას და ვინც ითხოვს სიმართლის, დოგმატების საფუძველზე მოგვარდეს პრობლემები. არ მინდა ვიფიქრო, რომ ეს ხდება ეკლესიის სადამსჯელო ოპერაციით, მე მინდა ვთხოვო მეუფეს და ყველა იერარქს, რომ სასწრაფოდ ჩატარდეს გაფართოებული კრება, რომ დროულად გადაიჭრას ყველა ეკლესიაში არსებული პრობლემები, დაგვიანება და დროის გაწელვა დაძაბავს მრევლში ვითარებას და მე არ მინდა ასეთი გაურკვევლობა იყოს ეკლესიაში“,- აცხადებს მონაზონი სუსანა.

ცნობისთვის, 8 მარტს დაპირისპირება მოხდა მარტვილის ეპარქიაში. შედეგად, ეპარქიის მოაჯირიდან ჟურნალისტები და ოპერატორები გადაცვივდნენ. დაშავდა ასევე „ტვ პირველის“ ოპერატორი ალეკო ხაზალია, ჟურნალისტი პაპუნა შუშანია და „რუსთავი 2“-ის ის ოპერატორი დათო კონჯარია. ეპარქიაში ის დიაკვნები და მრევლი შეიკრიბა, რომლებსაც მიტროპოლიტმა სტეფანემ მღვდელმსახურება შეუჩერა. ისინი მისგან ახსნა-განმარტებას ითხოვენ.

ეპარქიასთან შეკრებილმა სასულიერო პირებმა და მრევლმა მეუფე სტეფანეს გაშვება და მეუფე პეტრე ცაავას დაბრუნება მოითხოვეს. ახალმა მიტროპოლიტმა მეუფე სტეფანემ ბრძანება #2 გამოსცა, სადაც ახსნილია დეტალურად, თუ რატომ შეუჩერდათ ეპარქიაში მოღვაწე დიაკვნებს კონსტანტინე გაბისონიას და პეტრე ღუდუშაურს მღვდელმსახურება.

მარტვილისა და ჭყონდიდის ეპარქიაში მომხდარ ფაქტზე შსს-მ გამოძიება დაიწყო. დაშავებული ჟურნალისტი წუხელ თბილისში „ნიუ ჰოსპიტალში“ გადაიყვანეს, მისი მდგომარეობა მძიმეა, მას ხერხემლის მეოთხე მალა აქვს მოტეხილი.

ავტორი: თეა შონია