ევროპარლამენტარი ანდრიუს კუბილიუსი არჩევნების შედეგებზე, ოპოზიციაზე, ხელისუფლებასა და პოლიტიკურ კრიზისზე ტელეკომპანია “ფორმულას” ეთერში საუბრობს.
კუბილიუსი მხარეებს დიალოგის რეჟიმში გადასვლისკენ მოუწოდებს და აღნიშნავს, რომ ერთ-ერთი ავტორიტეტული არასამთავრობო ორგანიზაცია დარღვევების საკმაოდ მაღალ ციფრებს ასახელებს, რომელსაც შესაძლოა, დიდი გავლენა მოეხდინა არჩევნების საბოლოო შედეგზე.
“ვფიქრობ, მმართველ პარტიასა და ოპოზიციას შორის დიალოგი ძალიან მნიშვნელოვანია. ძირითადი პრობლემა გახლავთ პოლიტიკური კრიზისიდან გამოსვლა – ოპოზიცია ჩივის, რომ არჩევნების პირველ ტურში ძალიან ბევრი დარღვევები იყო.
ჩვენ, ევროპარლამენტის წევრები საერთაშორისო დამკვირვებლების შეფასებებს ვაკვირდებით. მათ განაცხადეს, რომ არჩევნები კონკურენტული იყო, მაგრამ ასევე იყო ბევრი დარღვევა.
იმედი გვაქვს, რომ დიალოგის ფორმატში, დაწყებული ცენტრალური კომისიის მუშაობით და გადათვლის სისტემით დამთავრებული, გასწორდება ეს დარღვევები, იმისთვის, რომ ნათელი გახდეს, რა იყო პირველი ტურის შედეგები.
მოვუწოდებთ ყველა მხარეს, დიალოგის გზით იარონ და ეს გამოწვევა დაძლიონ. მოვითხოვთ, ყველა დარღვევაზე რეაგირებას, შესწავლას. განიხილონ ყველა საჩივარი, რომელზეც კითხვის ნიშნები იყო.
ისეთმა ავტორიტეტულმა არასამთავრობო ორგანიზაციამ, როგორიცაა “ისვედი“, განაცხადა, რომ დაახლოებით ოქმების 8 პროცენტში ამომრჩეველთა და ბიულეტენების რაოდენობა ერთმანეთს არ ემთხვევა და ოქმებში უზუსტობაა. ცდომილება 4%-ია. საქართველოში პროპორციული არჩევნების ნაწილში, ეს ძალიან დიდია. ამერიკაში 1 %-იც კი დიდ განსხვავებას ქმნის და ბევრი დისკუსიაც მოსდევს თან. საქართველოში თუ საარჩევნო შედეგების 4 პროცენტზეა საუბარი, ეს დიდ კითხვის ნიშანს ბადებს. ამიტომ, ყველა საჩივარი სერიოზულად უნდა განიხილონ. დიალოგის რეჟიმში უნდა იმსჯელონ ამ გამოწვევის დაძლევაზე.” – აცხადებს ევროპარლამენტარი.
