საქართველოს მესამე პრეზიდენტს, მიხეილ სააკაშვილს საქართველოში ჩამოსვლა არაერთხელ დაუანონსებია. მის ჩამოსვლასთან დაკავშირებით მმართველ პარტიასა თუ ოპოზიციაში კომენტარებიც ბევრჯერ გაკეთდა.
მიხეილ სააკაშვილმა საქართველოში ჩამოსვლა ბოლოს 2 ოქტომბრის საღამოს დააანონსა. მან სოციალურ ქსელში ბილეთებიც გამოაქვეყნა. დღეს დილით მიხეილ სააკაშვილმა სოციალურ ქსელში პოსტი გამოაქვეყნა შემდეგი შინაარსით:
„დილა მშვიდობისა საქართველო. უკვე საქართველოდან 8 წლის შემდეგ“,- წერს მიხეილ სააკაშვილი.
მიხეილ სააკაშვილის ეს განცხადება შეაფასეს პოლიტიკურ პარტიებში. „გირჩის“ წევრი იაგო ხვიჩია დარწმუნებულია, რომ სააკაშვილი „უხარისხო ვიდეოებს“ „ქართულ ოცნებასთან“ შეთანხმებით ავრცელებს და აღვირახსნილ ტყუილს ამბობს.
„დღესაც მზად ვარ ფსონების მისაღებად იმ ხალხისგან, ვისაც სჯერა, რომ მიხეილ სააკაშვილი საქართველოშია. მზად ვარ, მათ დავენიძლავო! ზოგადად, ცალკე პრობლემაა, როცა ლაივს შენივე აშენებული ქალაქიდან დებ და ხალხი მაინც არ გიჯერებს, აქ ხარ თუ არა. კაცი ამბობს, აქ ვარო და მე მის თანამოაზრეებს ვერ ვპოულობ, ვინც ამაში დამენიძლავება.
სააკაშვილი შეთანხმებულია „ქართულ ოცნებასთან” და ისეთ ვიდეოებს დებს, როგორიც “ქართულ ოცნებას” აწყობს. სააკაშვილის ასეთი ვიდეოები, მით უფრო თუ ის საქართველოში არ არის, ერთადერთი “ქართული ოცნების” წისქვილზე ასხამს წყალს, რადგან სწორედ “ქართული ოცნების” ამომრჩეველს ამობილიზებს. ჩემი რწმენით, ეს კაცი საქართველოში საერთოდ არ არის და “ქართული ოცნების” ამომრჩეველს ასე ამობილიზებს. როდესაც ხვალ გაირკვევა, რომ მიხეილ სააკაშვილი საქართველოში არ არის, ეს ოპოზიციური ამომრჩვევლის იმედგაცრუებას გამოიწვევს.
თუ სააკაშვილი საქართველოში არ არის, წარმოიდგინეთ როგორ აბუჩად იგდებს საკუთარ ამომრჩეველს და როგორ ღია ტყუილზე მიდის, რაც არ დაიმალება. წარმოიდგინეთ, საკუთარი ამომრჩევლის როგორი უპატივცემულობაა, ასეთი იაფფასიანი ტყუილით მოტყუება იმისთვის, რომ არჩევნები “ქართულ ოცნებას” მოაგებინო“, – განაცხადა იაგო ხვიჩიამ.
